Святослав Кириллин салайааччылаах «Чүүйэ» муниципальнай унитарнай тэрилтэ 375 сүөһүнү кыстатан турар.
edersaas.ru
Бу барыта алта сыллааҕыта Алтайтан аҕалыллыбыт күрэҥ, кыһыл дьүһүннээх истиэп боруодалаах сүөһүлэр. Кулун тутар 19 күнүнээҕи туругунан, 70-тан тахса ынах төрөөбүт. Саҥа төрөөбүт ньирэйдэр биир нэдиэлэ устата ийэлэрин кытта тураллар, онтон тус-туһунан араарыллаллар. Хас биирдиилэрэ нүөмэрдэнэр, оҕус ньирэйдэр аттаналлар, оттон тыһылары, улаатан баран харсыспатыннар диэн, муостарын сиэттэрэн кэбиһэллэр.
‒ Ньирэй көрөөччү Александра Миронова, ыанньыксыт Руслан Иванов, осеменатор Дария Степанова, зоотехник Иван Петров, тырахтарыыс Николай Скрябин, суоппар Юрий Башарин, ис-тас араас үлэҕэ Николай Скрябин, Егор Антонов, Евгений Федоров уо.д.а. буолан үлэлиибит-хамсыыбыт, — диэн кэпсиир биригэдьиир Елена Карпова. — Былырыын кыстыыр оппут тиийбэккэ соҕурууттан аҕалтарбыт буоллахпытына, билигин чугастааҕы нэһилиэктэртэн, Холгуматтан уонна Чыамайыкыттан, булуннубут. Билигин Алтан нэһилиэгиттэн тиэйэ сылдьабыт. Өссө сүүс туонна от тиэллэн кэлиэхтээх.
Алтыс сылыгар барбыт аныгылыы тииптээх хотоҥҥо өрөмүөн наада буолбут, сүөһү ахсаана сыллата элбээн, балай эмэ кыараабыттар. Үлэһиттэр хамнастара кэмигэр кэлэр эбит.
‒ Быйыл 520 туонна оту бэйэбит оттообуппут, 300 туоннаны чугастааҕы нэһилиэктэрбититтэн дуогабарынан ыллыбыт. Икки дьаама толору сиилэс куттарбыппыт, биир дьаама бүттэ, ‒ диэн хаһаайыстыба тэриллиэҕиттэн үлэлии сылдьар зоотехник Иван Петров кэпсиир. – Комбикуорманы Хаптаҕайдааҕы собуоттан ылабыт. Күннэтэ биир туонна үүтү ыан, Тараҕай нэһилиэгэр Герасимов биирдэм тэрилтэтигэр туттарабыт. Үүппүт сыата 3,9 бырыһыаҥҥа тэҥнэһэр, сайынын 4,2 ‒ 4,5 бырыһыан буолар. Истиэп сүөһүлэрэ биһиги усулуобуйабытыгар иитиллиэхтэрин сөп, кылаабынайа аһын-үөлүн хааччыйдахха, үүтү биэрэр кыахтаахтар. Онон, инникитин эбии аһылык базатын хаҥатыахпытын наада. Сиилэс, зеленка, сенаж курдук сүмэһинээх аһылыктаах буоллахпытына, чугас сытар нэһилиэктэрбитин үрүҥ аһынан хааччыйыахпыт. Урукку сыллары кытта тэҥнээтэххэ, сыл аайы тупсан иһэбит, дьон үлэтин чэпчэтэр ньымалары тобула сатыыбыт. Ааспыт 2018 сыл түмүгүнэн «Сыл бастыҥ осеменатора» аатын сүкпүт уопуттаах осеменатор Дария Николаевна кыһамньытынан, искусственнай сиэмэлээһиҥҥэ күүскэ үлэлиибит.
Виктория Белолюбская, «Саха сирэ» хаһыат, edersaas.ru