Өймөкөөн улууһун Үчүгэй нэһилиэгэр саастаах дьон кус бэлэх тутан үөрдүлэр.
Аҕалар түмсүүлэрэ бүгүн, Ньукуолун күнүн көрсө «Байанай бэлэҕэ» аахсыйа тэрийэн, тыыл бэтэрээннэригэр уонна 65-тэн үөһэ саастаах дьоҥҥо үстүү куһу бэлэхтээтилэр. Аҕалар түмсүүлэрин салайааччыта Александр Слепцов бэлиэтииринэн, нэһилиэк эр дьоно ким төһө кыайарынан: сэттэлии, иккилии куһу биэбиттэр.
«Уопсайа 40-ча куһу хомуйан, 12 ытык киһиэхэ түҥэттибит. Маны таһынан уһуйааммыт кырачааннарыгар сарсын, Ньукуолун күнүгэр, кус миинин иһэллэригэр эмиэ анаан бэлэхтээтибит. Оҕо тэрилтэтэ экология хайысхатынан үлэлиир. Иитээччилэр Ньукуолун күнүгэр кырачааннарга саха норуотун сиэрин-туомун үөрэтиэхтэрэ, Сайылык күнүгэр анаан тэрээһин ыытыахтара, алаадьы сиэхтэрэ, кус этин, миинин амсайыахтара«, — диэн Александр Константинович кэпсиир. Аҕалар түмсүүлэрин түөрт сыллааҕыта олохтоох оскуола учуутал эр дьоно тэрийбиттэр. Быйыл сыл саҕаланыыта нэһилиэк аҕаларын сэбиэтин кытта холбоһон, биир күүс түмсүү буолбуттар. Түмсүү салайааччыта Александр Слепцов бэлиэтииринэн, нэһилиэк 40-ча аҕата биир сомоҕо буолаллара, үлэни тэрийиигэ ордук көдьүүстээх. Аҕалар түмсүүлэрэ быйыл «Тымныы полюһа» кыһыҥҥы туризм бэстибээлигэр култуура киинин кытта кыттыһан, нэһилиэк түһүлгэтин оҥорон, эбээн норуотун култууратын билиһиннэрэн, СӨ Предпринимательство уонна туризм дьыалаларын министиэристибэтин кыраамататынан бэлиэтэммиттэр. Ити курдук, Үчүгэй нэһилиэгэр бу дьоһун түмсүү кыттыылаахтара сонунтан сонун, саҥаттан саҥа үтүө дьыала сүүрээнин олоххо киллэрэн, биир дойдулаахтарын өйөөн үөрдэллэр.
Елена ПОТОЦКАЯ, «Саха сирэ» хаһыат, edersaas.ru
Гаврил Лазарев хаартыскаларга түһэриитэ