CAS Арассыыйа спортсменнарын дьыалаларын тохсунньу 28-гар диэри көрүөҕэ
Аан дойдутааҕы олимпийскай кэмитиэт (МОК) кыһыҥҥы Олимпийскай оонньууларга Арассыыйа спортсменнарыттан кимнээх кытталларын туһунан тохсунньу 28 күнүгэр диэри быһаарыы ылыныаҕа. Бу туһунан кэмитиэт пресс-сулууспатыгар сигэнэн Р-спорт ааҕыныстыба иһитиннэрэр.
Биллэрин курдук, 2017 сыл ахсынньы 5 күнүгэр МОК Арассыыйа сүүмэрдэммит хамаандатын Олимпиадаҕа бэйэтин былааҕынан, өрөгөй ырыатынан (гиминэн) кыттарын боппута, итиэннэ урут допины туттууга күтүрэммэтэх спортсменнары “Арассыыйаттан сылдьар олимпийскай атлеттар” диэн аатынан эрэ күрэстэһэллэрин көҥүллээбитэ.
Ааспыт ыйга МОК анал хамыыһыйатын мунньаҕар Арассыыйа 43 спортсменын допины туттууга буруйдаабыттара, урукку сыллардааҕы көрдөрүүлэрин көтүрбүтэ итиэннэ Олимпийскай оонньуулартан үйэлэрин тухары туоратарга быһаарбыта. Допиҥҥа сыһыана суохтарын бигэргэтэр спортсменнар киллэрбит үҥсүүлэрин Спорт арбитражнай суута (CAS) үөрэтэ сылдьар. CAS пресс-сулууспата иһитиннэрбитинэн, дьыалалар хаһан, ханна көрүллүөхтэрэ биллибэт. Арассыыйаттан Олимпиадаҕа кыттааччылар бүтэһиктээх испииһэктэрин суут тохсунньу 28-гар диэри ылыаҕа диэн буолар.
Роман ПОПОВ, “Саха сирэ” хаһыат, edersaas.ru