Доруобуйа Маны аах

Cаха сирин онкологтарын үлэлэрин үрдүктүк сыаналаатылар

Муус устар 23 күнүгэр Онкология өрөспүүбүлүкэтээҕи диспансерыгар ыытыллыбыт “Тонкости поддерживающей терапии. Снова вместе” “төгүрүк остуолга” федеральнай эксперт Антон Снеговой кытынна.

 

Тэрээһини  мэдиссиинэ наукатын хандьыдаата, СӨ Доруобуйа харыстабылын министиэристибэтин штаты таһынан кылаабынай  онколога,  Онкология диспансерын  химиотерапияҕа отделениетын сэбиэдиссэйэ Феодосия Гаврильевна Иванова  эҕэрдэ тылынан  арыйда. “Төгүрүк остуолга” диспансер уонна онкология амбулаторияҕа көмөтүн кииннэрин онкологтара кытыннылар. Феодосия Иванова бэлиэтээн эппитинэн, билигин химиотерапия куурустарын 15 оройуон кииннэригэр ыыталлар.

Бастакынан  лиэксийэни мэдиссиинэ наукатын доктора,  Н.А.Лопаткин аатынан Урология уонна интервенционнай радиология НЧИ искэни утары терапия отделын сэбиэдиссэйэ Антон Владимирович Снеговой аахта.

Экспери  кытары биһиги эмчиттэрбит искэн ыарыылаахтары эмтиир терапия ымпыгын-чымпыгын дьүүллэстилэр.

«Быраастар улахан кыахтаахтар, кинилэр эмтээһин аныгы  сүрүн хайысхаларын уонна бырактыычаскай сүбэлэри, ыйыылары-кэрдиилэри билэллэр. Манна олус үчүгэй фармакологическай база –  Арассыыйаҕа эрэ буолбакка, аан дойдуга туһаныллар аныгы препараттар бааллар. Онон,  өрөспүүбүлүкэ химиотерапияҕа сулууспатын Арассыыйаҕа биир бастыҥынан сыаналыыбын”, диэн Антон Владимирович  Саха сирин онкологтарын кыахтарын сыаналаата уонна химиотерапия сулууспатын дойдуга биир бастыҥынан ааттаата.

Эмчиттэр химиотерапия кэмигэр уустугуруон сөптөөх ыарыыны сэрэтии, фебриальнай нейтропения боппуруостарыгар болҕомтолорун уурдулар. Ону таһынан эмтэниигэ саҥа  ньымалары, эминэн-томунан эмтэниигэ бырактыычаскай көрүүлэри дьүүллэстилэр.

«Өрөспүүбүлүкэҕэ онкология ыарыытын хабаана улаатар, ол гынан баран, дойдуга ыарыы көрдөрүүтүн ылан көрөр буоллахха,  биһиги ортоку таһымҥа сылдьабыт. Өлүү көрдөрүүтүгэр эмиэ орто кирбиигэ баарбыт. Биһиги сыл аайы 2500-чэ саҥа эмтэнээччини булабыт, сыл аайы 1200 ыарыһаҕы сүтэрэбит.   Бастакы миэстэҕэ – тыҥа, иккискэ – куртах, үһүскэ эмиий араактара тураллар. Хомойуох иһин, үгүс ыарыһахтар үһүс стадия кэнниттэн, хойутаан кэлэллэр.  Маннык түгэҥҥэ химиотерапиянан эрэ эмтииргэ тиийэҕин. Ол иһин, биһиги онкологтарбыт ордук таһымнаах буолалларын наадатыгар  эминэн-томунан эмтэниини сайыннарыахтаахпыт,  түмүгэр бу биһиги эрэгийиэммитигэр өлүү көрдөрүүтүгэр дьайыылаах буолуоҕа”, — диэтэ Феодосия Иванова.

Онкология диспансерын  химиотерапияҕа отделениетын күнүскү стационарын сэбиэдиссэйэ Елена Николаевна Александрова  биир идэлээхтэрин кытары килиниичэскэй түгэннэри ырытыста, “арыаллыыр” терапия уонна химиотерапиянан эмтэнии кэмигэр балаһыанньаны хонтуруоллааһын боппуруостарын сырдатта.

Манна сыһыаран эттэххэ, Дьокуускайга Онкология диспансерын саҥа  дьиэтэ былаан быһыытынан 2024 сылга киириэхтээх. Ол эрэн, тутуу графигы аһаран иһэринэн, 2023 сылга үлэҕэ киллэриллэр кыахтаах.

 Надежда ЕГОРОВА, «Саха сирэ», edersaas.ru

 

2
0
Telegram @edersaas20