Ил Дархан Айсен Николаев бэс ыйын 22 күнүгэр «Россия 24» ханаалга быһа эпииргэ Украина балаһыанньатын уонна кинилэргэ хайдах көмөлөһүөххэ сөбүн туһунан ыйытыыларга хоруйдаабыта. Айсен Николаев бу туһунан элбэх киһи ыйыталаһарын уонна тус бэйэтигэр эмиэ суруйалларын туһунан эппитэ.
edersaas.ru
Бэҕэһээ, бэс ыйын 28 күнүгэр, Айсен Николаев уонна Кировскай куорат дьаһалтатын баһылыга Сергей Ермаков Саха сирин уонна Донецкай Норуодунай Өрөспүүбүлүкэ Кировскай куоратын кытары бииргэ үлэлиир туһунан Сөбүлэһиигэ Кировскай куоракка илии баттаатылар.
Саха сирэ Кировскай нэһилиэнньэтэ төрүт олохторугар төннөн, эйэлээх олоххо олорорун туһугар куорат экэниэмикэтин уонна социальнай эйгэтин түргэнник чөлүгэр түһэрэргэ көмөлөһүөҕэ.
«Биһиги хайыы үйэ ыам ыйыттан ыытар үлэбитин Сөбүлэһиигэ бэлиэтээтибит. Үлэни сүрүннүүргэ Кировскай куорат дьаһалтатын кытары бастакы уочараттаах соруктары быһаарар суһал ыстаап уонна оробуочай бөлөх тэрилиннэ. Чөлүгэр түһэриллиэхтээх эбийиэктэр, ол иһигэр доруобуйа харыстабылын, үөрэхтээһин, сылааһынан хааччыйыы, уот уонна суол ситимнэрэ, быһаарылыннылар”, — диэн Айсен Николаев Кировскайга оробуочай сырыытыттан иһитиннэрдэ.
Сөбүлэһиигэ ону таһынан бырамыысыланнас, предпринимательство, агробырамыысыланнай комплекс, наука, үөрэхтээһин, ыччат бэлиитикэтин, доруобуйа харыстабылын, социальнай көмүскэл, успуорт, туризм, култуура, баҕа өттүнэн көмөлөһүү, эргиэн-экэниэмикэ эйгэлэригэр холбоһуктаах бырайыактары уонна быһаарыылары олоххо киллэриигэ өрүттэр соруктарын чопчулаатылар.
Надежда ЕГОРОВА, «Саха сирэ», edersaas.ru