Култуура Маны аах

Быыстапка: тыйаатыр артыыстара Достоевскай айымньыларын дьоруойдарыгар

А.С.Пушкин аатынан Нуучча драматическай тыйаатырыгар аһыллыбыт «Достоевскай: ойуулааһыннар» диэн хаартыскалар быыстапкалара суруйааччы Федор Достоевскай 200 сылыгар ананар.

edersaas.ru

Сонун быыстапка хаартыскаларыгар  тыйаатыр артыыстара  нуучча суруйааччытын айымньыларыттан персонажтары көрдөрдүлэр.
Быыстапка ааптара, тыйаатыр дириэктэрэ уонна уус-уран салайааччыта Александр Лобанов:
«Былырыын биһиги тыйаатырбыт 130 сылын ылбыта. Сезоммут олус уустук туруоруулартан уһун кэмнээх гостуруолларга тиийэ, толору ис хоһоонноохтук  ааста. 2021 сылга Арассыыйа Федор Михайлович Достоевскай төрөөбүтэ 200 сылын бэлиэтээбитэ. Кинини ким эрэ толкуйа суох киһинэн, ким эрэ уһулуччу талааннааҕынан ааҕар. Ол да буоллар, кини аата, чуолаан кыраныысса таһыгар,  нуучча литературатын синонимынан хаалар. «Агора» баан көмөтүнэн олоххо киллэриллибит «Достоевскай-ойуулааһыннар» бырайыакпытынан суруйааччы айымньыларын ис туругун, эйгэтин көрдөрөргө кыһанныбыт. Ону таһынан, быыстапка тыйаатыр репертуарыгар Достоевскай аата баар буоларыгар бастакы хардыынан буолуоҕа», — диэн көрөөччүлэр сыаналыахтарыгар эрэлин биллэрдэ.
Хаартыскаҕа түһэрээччи -– тыйаатыр артыыската Елена Сулак иһитиннэрбитинэн, тыйаатыр кэлэктиибэ  бу иннинэ өссө икки бырайыакка үлэлээбит.
Быыстапкаҕа уонна тыйаатырга кэлбит дьон «Подросток», «Преступление и наказание», «Кроткая», «Братья Карамазовы», «Игрок», «Идиот» айымньылар дьоруойдарын артыыстар мөссүөннэринэн билсиэхтэрэ. Ол курдук, кинилэр таптыыр артыыстара Александр Кабуновы, Илья Данилевскайы, Татьяна Медвинскайаны, Ксения Зыкованы, Наталья Лукьянованы, Эдвардас Купшиһы, Дарья Рокачеваны, Марина Слепневаны, Екатерина Нарышкинаны, Степан Федоренконы, Евгений Золотуевы, Александр Лобановы атын уобарастарга көрүөхтэрэ.
Бырайыак ааптара — Александр Лобанов, бырайыак куратора — Андрей Габышев, хаартыскаҕа түһэрээччи — Елена Сулак, көстүүмнэр худуоһунньуктара — Евдокия Сотникова, көстүүмнэргэ худуоһунньук ассистена — Татьяна Белоусова, гириим уонна графика худуоһунньуга — Александра Тарасова.  
Быыстапканы тыйаатыр сезона бүтүөр диэри Нуучча драматическай тыйаатырын иккис этээһин фойетыгар көрүөххэ сөп.

Надежда ЕГОРОВА, «Саха сирэ», edersaas.ru

0
0
Telegram @edersaas20