Бу күннэргэ «Симэх» Национальнай галерея СӨ Норуоттар ассамблеяларын уонна Өксөкүлээх Өлөксөй аатынан Норуоттар доҕордоһууларын дьиэтин өйөбүллэринэн Славян омук суругар-бичигэр анаммыт «Быысыпкаламмыт хартыына» өрөспүүбүлүкэтээҕи быыстапканы арыйда.
Маннык тэрээһин 8-с төгүлүн ыытыллар. Быйыл тэрийээччилэр 22 сайаапканы 10 улуустан уонна Дьокуускайы кытта Брянскай куораттартан ыллылар. Уопсайа 7 номинацияҕа 108 үлэ киирдэ. Ол курдук, быысыпкаламмыт икона, пейзаж, анималистика, мэтириэт, натюрморт уо. д.а. тиэмэлэрдээх үлэлэр киирбиттэр. Быыстапка саалатыгар кыттыылаахтар үлэлэрэ дьон дьүүлүгэр туруорулунна. Быйыл сыстыганнаах дьаҥынан сибээстээн аан бастаан куйаар ситиминэн үлэлэри эмиэ ыллылар. Онлайн-быыстапкаҕа 31 маастар кыттыыны ылла. Уопсайа Саха сириттэн 13 улуустан 125 үлэ киирдэ.
«Симэх» галереяҕа быыстапка ыам ыйын 30 күнүгэр диэри бары санитарнай-эпидемиологическай быраабыла тутуһуллан ыытыллыаҕа.
Елена ПОТОЦКАЯ Саха сирэ хаһыат, edersaas.ru