Семен Новгородов аатынан «Айар» кинигэ кыһата Cаха Өрөспүүбүлүкэтигэр от ыйын 1 күнүгэр Национальнай бэчээт күнүн көрсө «Быыкаа кинигэ» («Мини-книга») өрөспүүбүлүкэтээҕи куонкуруһу биллэрдэ.
edersaas.ru
Куонкурус «Айар» кинигэ кыһатын көҕүлээһининэн СӨ Национальнай бибилэтиэкэтин кытары ыытыллар.
Куонкурус соругунан ааҕааччы кинигэҕэ, уус-уран литератураҕа интэриэһин үөскэтии, оҕолор уонна улахан дьон айар кыахтарын сайыннарарга усулуобуйаны тэрийии, оҕо уонна төрөппүт сыһыаннарын дьүөрэлииргэ, иитэр-үөрэтэр эйгэни тэрийэргэ ааҕааччылары уонна кинигэни сыаналааччылары кытары бииргэ үлэлэһии уо.д.а. буолаллар.
Куонкуруска сааһыттан тутулуга суох ким баҕарар кыттар.
Куонкуруска киирэр кинигэлэр бэс ыйын 20-28 күннэригэр ылыллаллар. Аадырыстара: Дьокуускай куорат, Курашов аатынан уулусса 30/1, 104 кэбиниэт. Блисиһэр төлөпүөн: 8 (4112) 444-206.
Куонкурус түмүктэрин бэс ыйын 30 күнүгэр 15.00 чаастан СӨ Национальнай бибилэтиэкэ Историческай саалатыгар билиһиннэриэхтэрэ. Ону сэргэ бу күн Национальнай бибилэтиэкэ сэдэх кинигэлэрин пуондаларыттан быыкаа кинигэлэр быыстапкалара аһыллыаҕа. Куонкурус лауреаттарыгар уонна номинаннарыгар наҕараадалары туттарыахтара.
Куонкуруска ханнык баҕарар кинигэ кыһата, полиграфическай кэмбинээттэр, биирдиилээн дьон эбэтэр айар бөлөхтөр таһаарбыт кинигэлэринэн кыттыахха сөп. Кинигэ үрдүгэ уонна кэтитэ 76 миллимиэтиртэн улахан буолуо суохтаах.
Куонкурус маннык номинацияларынан ыытыллар:
– Саамай-саамай быыкаа кинигэ;
– Саамай былыргы быыкаа-кинигэ;
– Саамай халыҥ быыкаа-кинигэ;
– Саамай улахан быыкаа-кинигэ;
– Бэйэ оҥорбут быыкаа-кинигэтэ.
Кыайыылаах кинигэлэр Национальнай мусуой Историческай саалатын быыстапкатыгар көрдөрүүгэ ууруллуохтара. Номинаннар дипломнарынан уонна өйдөбүнньүк бириистэринэн наҕараадаланыахтара, кыттааччыларга барыларыгар сэртипикээт бэриллиэҕэ.
Куонкурус түмүктэрэ «Айар» кинигэ кыһатын www.ayar.ru сайтыгар бэчээттэниэхтэрэ.
Надежда ЕГОРОВА, «Саха сирэ», edersaas.ru