Сүрүн

Быыбары кэтээн көрүүгэ анаан Уопсастыбаннай киин үлэлиэҕэ

Дьокуускай куоракка Курашов уулуссатыгар баар СӨ Уопсастыбаннай киинин  алтыс этээһигэр  Уопсастыбаннай  кэтээн көрүү киинэ  үлэтин саҕалыаҕа. Манна юридическай уонна мониторинг бөлөҕө, сонуну киэҥник тарҕатар ситимнэр  баар буолуохтара.  Бу туһунан уопсастыбаннай кэтээн көрүү киинин салайааччыта, СӨ уопсастыбаннай палаататын чилиэнэ Альбина Черепанова иһитиннэрдэ.

 

«Уопсастыбаннай кэтээн көрүү киинэ аан бастаан Дьокуускайга  аһыллыаҕа. Киин үлэтэ балаҕан ыйын 16 күнүгэр, 16.00 чааска куоластааһын иннинэ, аһыллыаҕа. Маннык кииннэр Россия хас биирдии регионугар быыбары кэтээн көрөр уопсастыбаннай штабтар былаһааккаларыгар үлэлиэхтэрэ. Кииҥҥэ ким баҕарар киириэн сөп. Быыбар учаастактарын үлэтэ суукка устата  улахан мониторга көстө туруоҕа«, — диэтэ Альбина Прокопьевна.

Кини этэринэн, хас биирдии учаастакка кэтээн көрүү бэрэстэбиитэллэрэ элбэх буолаллара күүтүллэр. Учаастактааҕы быыбардыыр хамыыһыйалар үлэлэрин уонна үлэлэрин  политическай партиялар бэрэстэбиитэллэрэ, кандидаттар  кэтээн көрүөхтэрэ.

— Кинилэр уопсастыбаннай  кэтээн көрүү киинигэр кэлэн быыбар хаамыыта  хайдах баран иһэрин, ол эбэтэр атын учаастакка туох буола турарын көрүөххэ сөп, — диэтэ Альбина Черепанова.

СӨ уопсастыбаннай палатата 2021 сыллааҕы быыбарга  икки тыһыынчаттан тахса  уопсастыбаннай кэтээн көрөөччүлэри  бэлэмнээтэ.

edersaas.ru

0
0