Хандьыдааттар илии баттааһынын хомуйан Быыбар киин хамыыһыйатыгар (БКХ) докумуоннарын бүгүҥҥүнэн туттаран бүтэллэр. Быыбар киин хамыыһыйата киирбит докумуоннары бэрэбиэркэлээн баран, олунньу 10 күнүгэр диэри бүлүтүөҥҥэ киирэр бүтэһиктээх испииһэги таһаарыаҕа.
Быыбар киин хамыыһыйатын иһитиннэриитинэн, 12 хандьыдааттан бастакынан Владимир Путин докумуоннарын туттарбыт. Санатан эттэххэ, бэйэ кандидатуратын туруоруммут дьон 300 тыһыынчаттан итэҕэһэ суох илии баттааһынын хомуйуохтаахтара. Владимир Путины таһынан Владимир Михайлов бэйэтин кандидатуратын туруоруммута. Онон кини эмиэ 300 тыһ. тахса илии баттааһыны ылыахтаах.
Оттон баартыйалаахтартан, икки регистрацияламмыт хандьыдааттан Владимир Жириновскайтан (“ЛДПР”), Павел Грудининтан (“КПРФ”) ураты, уон киһи хаалла: Григорий Явлинскай (“Яблоко”), Борис Титов (“Партия Роста”), Эльвира Агурбаш (“Альянс зеленых”), Сергей Бабурин (“Российский общенародный союз”), Ксения Собчак (“Гражданская инициатива”), Станислав Полищук (“Партия Социальных реформ”), Михаил Козлов (“Партия социальной защиты”), Максим Сурайкин (“Коммунисты России”), Наталья Лисицына (“Российский Объединенный Трудовой Фронт”) уонна Ирина Волынец (“Народная партия России”). Баартыйаттан кыттар хандьыдааттар 100 тыһ. илии баттааһынын хомуйуохтаахтар. Биир регионтан 2,5 тыһыынчаны ылаллара көҥүллэнэр.
Илии баттааһынын бэрэбиэркэлээһин икки түһүмэҕинэн барыаҕа. Бастатан туран, исписэлиистэр төһө илиис, куолас киирбитин ааҕыахтара. Иккиһинэн, мантан түбэһиэх 60 тыһыынча илии баттааһынын талан ылан, сыныйан үөрэтиэхтэрэ. Быыбар киин хамыыһыйата иһитиннэрэринэн, илии баттааһынын бэрэбиэркэтигэр барыта 100 киһи кыттыахтаах. Ол иһигэр Быыбар киин хамыыһыйатын аппараата, Информатизация федеральнай киинин үлэһиттэрэ, буочары быһаарар экспертэр, о.д.а. бааллар. Быраабыла быһыытынан, испииһэккэ киирбит илии баттааһыннартан сыыһата 5 % элбэҕэ суох буолуохтаах. Өскөтүн бу биэс бырыһыаны куоһарар буоллаҕына, исписэлиистэр өссө 30 тыһыынча куолаһы эбии ылан бэрэбиэркэлиэхтэрэ. Бэрэбиэркэ аҕыс күн устата ыытыллар. Исписэлиистэр Быыбар киин хамыыһыйатын мунньаҕа буолуон икки күн иннинэ хандьыдааттарга бэрэбиэркэ түмүгүн иһитиннэриэх тустаахтар.
Онон хандьыдааттар быыбарга кыттыыга бэлэмнэнии иккис түһүмэҕин ааһан эрэллэр. Үһүс эргииргэ кимнээх киирбиттэрэ олунньу 10 күнүгэр биллиэҕэ. Аҕытаассыйа олунньу 17 күнүттэн саҕаланыаҕа.
Аграфена КУЗЬМИНА, “Саха сирэ” хаһыат, edersaas.ru