Кулун тутар 22 күнүгэр Арктикатааҕы быыбардыыр уокурукка Ил Түмэн дьокутаатын болдьоҕун иннинэ быыбара буолар. Быыбарга Валерий Арешкин (КПРФ), Матвей Евсеев (Биир ньыгыл Арассыыйа), Аркадий Клепечин (Сиэрдээх Арассыыйа), Евгений Рябченко (ЛДПР) кытталлар.
Биэс хотугу улууска быыбардыыр учаастактар аһыллыбыттара икки чаас буолбутун кэннэ, быыбардааччы 16,95 %-а кэлэн куоластаата.
— Сарсыарда 8 чаастан 29 быыбардыыр учаастак үлэтин саҕалаабыта,– диир өрөспүүбүлүкэтээҕи Киин быыбардыыр хамыыһыйа бэрэссэдээтэлэ Алексей Ефимов. – Ол иһигэр, Усуйаанаҕа 12, Абыйга сэттэ, Аллайыахаҕа уонна Аллараа Халымаҕа биэстии учаастак үлэлиир. Олохтоох бириэмэнэн, 12 чааска Абыйга быыбардааччы 24,73 %-на, Аллараа Халымаҕа — 15,08 %-а, Аллайыахаҕа — 13,32 %-а, Усуйаанаҕа — 14,57 %-а гражданскай иэстэрин толордулар. Онон, ортотунан ыллахха, быыбардааччы 16,95 %-а дьокутаатын талла. Дьон быыбарга холкутук кэлэр. Быыбардыыр хамыыһыйалар антисептик тэриллэринэн уонна мааскаларынан хааччыллан олороллор. Үлэ барыта тэрээһиннээхтик баран иһэр.
35 №-дээх Арктикатааҕы быыбардыыр уокурукка быыбар хаамыытын туһунан иһитиннэрии күнүс 3 чааска таһаарыллыаҕа. Тоҕо диэтэххэ, чахчылары тириэрдии Москав нөҥүө «Быыбар» ГАС ситиминэн бэрилэллэр.
Маны таһынан, муниципальнай таһымнаах быыбар биэс нэһилиэккэ ыытыллар. Ол курдук, Таатта улууһугар Алдан, Өлүөхүмэ улууһугар Улахан Муҥку, Ньурбаҕа Малдьаҕар, Аллараа Халымаҕа Походскай нэһилиэктэрин быыбардаачччылара олохтоох дьаһалта баһылыктарын талаллар. Оттон Бүлүү улууһун Бөкчөҥөөтүн олохтоохторо нэһилиэктэрин дьокуттаарын болдьоҕун иннинэ талаллар.
Раиса Сибирякова, «Саха сирэ» хаһыат, edersaas.ru