Олунньу бүтүүтэ Арассыыйа Быыбардыыр хамыыһыйатын киинэ ыраахтан олорон быыбардыыр техническэй комплекс тургутуутун оҥорорун туһунан иһитиннэрбитэ. Электроннай куолаһы ааҕар ньыма бу сыл балаҕан ыйын 19-гар ыытыллыахтаах быыбарга туттуллуохтаах.
Бу күн уопсайа биэс хайысханан быыбар оҥоһуллар:
— РФ Федеральнай мунньаҕын ахсыс ыҥырыытын дьокутааттарын талыы
— Халыма Индигиир улуустарыгар народнай дьокутааттары талыы
— Булуҥ уонна Эдьигээн улуустарын баһылыгын талыы
— Абый, Эдьигээн, Аллараа Халыма, Орто Халыма улуустарыттан дьокутааттары талыы
— 33 куорат, сэлиэнньэ баһылыктарын уонна түөрт улуус киинин (Белай Гора, Тикси, Сангаар, Черскэй) баһылыктарын талыы.
Дьарык хамыыһыйа уонна систиэмэ үлэтин бэрэбиэркэлиир сыаллаах оҥоһуллуоҕа. Куоластааччылар «Судаарыстыбаннай өҥө» порталыгар киирэн бэлиэтииллэр. Бастаан муус устар 21 күнүттэн ыам ыйын 7 күнүгэр дылы куоластааччылар сайаапка түһэрэллэр. Куоластааһын ыам ыйын 12 күнүттэн, 14 күнүгэр дылы ыытыллыаҕа.
Систиэмэ үчүгэй тургутууну ааһарыгар бары талааччылартан 1,5 % киһи куоластыахтаах. Биһиги өрөспүүбүлүкэбитигэр 10 тыһыынча киһи.
Виктория Бястинова, edersaas.ru саайт, «Саха сирэ» хаһыат.
Хаартыска www.vedomosti.ru