Атырдьах ыйын 16 күнүгэр 2022-2027 сылларга Саха Өрөспүүбүлүкэтин Быыбар киин хамыыһыйатын бастакы тэрээһин мунньаҕа буолла.
Мунньахха РФ Быыбар киин хамыыһыйатын сэкирэтээрэ Н.А.Бударина, РФ БКХ чилиэнэ Б.С. Эбзеев, СӨ Ил Дарханын уонна бырабыыталыстыбатын дьаһалтатын салайааччы Г.Н. Михайлов, СӨ Судаарыстыбаннай Мунньаҕын (Ил Түмэн) бэрэссэдээтэлин бастакы солбуйааччы А.Н.Жирков уо.д.а.кытыннылар.
Бу күн Быыбар киин хамыыһыйатыгар саҥа үлэһиттэри сокуоҥҥа олоҕуран аһаҕастык таллылар. Хамыыһыйаҕа барыта 13 киһи киирдэ, өссө биир үлэһити Арассыыйатааҕы Киин быыбардыыр хамыыһыйа аныаҕа. Саҥа састаап чилиэннэринэн Иван Михайлович Андросов, Александр Васильевич Власов, Нюргун Васильевич Ефремов, Ирина Николаевна Конакова, Татьяна Ивановна Кривошапкина, Эльвира Трофимовна Мярикянова, Алексей Алексеевич Окороков, Евгений Викторович Рябченко, Алла Георгиевна Самойлова, Михаил Эдуардович Слепцов, Сардана Константиновна Таппагарова, Ирина Павловна Ушакова, Евгений Николаевич Федоров буоллулар.
Кистэлэҥ куоластааһынынан эрэгийиэннээҕи Быыбар киин хамыыһыйатын бэрэссэдээтэлинэн Евгений Федоров биэс сылга биир санаанан талылынна.
«Өрөспүүбүлүкэҕэ хамыыһыйалар икки ардыларыгар ыраахтан олорон кэпсэтии бары ньымаларын көхтөөхтүк туһаналлар. Евгений Николаевич бэйэтин миэстэтигэр олорор, кини үчүгэй хамаанданы тэрийбитэ», -– диэн БКХ баһылыга Элла Памфилова бэлиэтээн эттэ.
Онтон куоластааһын түмүгүнэн Быыбар киин хамыыһыйатын сэкирэтээринэн Алла Самойлова, хамыыһыйа бэрэссэдээтэлин солбуйааччыларынан Иван Андросов, Александр Власов, Ирина Конакова талылыннылар.
Хамыыһыйа саҥа састааба сыл аайы кэриэтэ РФ уонна өрөспүүбүлүкэҕэ улахан суолталаах быыбар хампаанньаларын ыытыаҕа. Ол курдук, быйыл Саха сиригэр быыбар киэҥ хампаанньата ыытыллыаҕа. Быыбардааччылар уон улуус баһылыгын талыахтара. 2023 сылга Саха сирин Ил Дарханын уонна өрөспүүбүлүкэ норуодунай дьокутааттарын, 2024 сылга РФ бэрэсидьиэнин, 2026 сылга РФ Судаарыстыбаннай Дууматын дьокутааттарын быыбардара буолуохтара.
Евгений Федоров:
-Бу биэс сылга сыалбыт-сорукпут наһаа киэҥ, улахан. Хас сыл аайы улахан быыбардары ыытарга бэлэммит. Балаҕан ыйын 11 күнүгэр муниципальнай быыбардарга 486 улахан хампаанньаны ыытыахтаахпыт, 5 улууска дьокутааттарбытын талыахтаахпыт, — диэтэ.
Надежда ЕГОРОВА, «Саха сирэ», edersaas.ru