Өймөкөөҥҥө улуус дьаһалтатын баһылыга уонна дьокутааттар талыллаллар.
Улуус баһылыгар хандьытааттар бэһиэлэр: Уус Ньара бөһүөлэк баһылыга Василий Ефимов, улуус баһылыга Михаил Захаров, спорт эйгэтигэр үлэлээбит Александр Оконешников, «Технор» ХЭТ дириэктэрэ Александр Роданич уонна биирдэм урбаанньыт Владимир Ю. Кинилэртэн «Биир ньыгал Россия» баартыйа Михаил Захаровы хандьытаатынан туруорбут, атыттар бэйэлэрэ туруоруммуттар.
Сарсыарда 9 чаастан улуус киинигэр Уус Ньара бөһүөлэгэр уонна нэһилиэктэргэ барыта холбоон 17 быыбардыыр учаастак быыбардааччыларга ааннарын арыйдылар. Ханна да буоларын курдук, сарсыарда өттүгэр киһи аҕыйах, сүрүннээн сааһырбыт дьон быыбардыыллар. Орто саастаахтар уонна эдэрдэр күнүстэн киэһэ тоҕо анньан кэлэллэрэ күүтүллэр. Даҕатан эттэххэ, Өймөкөөн оройуонугар бириэмэ Дьокуускайга тэҥнээтэххэ, биир чааһынан эрдэлээн иһэр.
Тымныы киининэн аатырбыт кырдьаҕас Өймөкөөн нэһилиэгэр 440 №-дээх быыбардыыр учаастак “Полюс холода” култуура дьиэтигэр тэрилиннэ. Быыбар хамыыһыйатын чилиэннэрэ Оксана Степанова, Саргылаана Сивцева уонна Людмила Репина бэрэссэдээтэл Елена Винокурова салалтатынан испииһэги, сааланы эрдэттэн оҥорон-тэрийэн, быыбардааччылары бэлэмнээх көрүстүлэр.
Раиса Сибирякова, “Саха сирэ” хаһыат, edersaas.ru.
Күүстээх аҥардар бастакынан быыбардаатылар. Хаҥастан уҥа: быыбар хамыыһыйатын чилиэннэрэ Сардаана Степанова, Людмила Репина
Нэһилиэк баһылыгын солбуйааччы Лия Старкова
Елена Степанова.