Кулун тутар 4 күнүгэр Дьокуускай куорат куораттааҕы быыбардыыр хамыыһыйатын бэрэссэдээтэлэ Алла Самойлова уонна сэкирэтээрэ Светлана Иванова пресс-кэмпириэнсийэҕэ куорат салайааччытын дуоһунаһыгар кыттар хандьыдааттары регистрациялааһын түмүгүн иһитиннэрдилэр.
edersaas.ru
Бу күн туругунан 11 киирбит сайаапкаттан 8 хандьыдаат бигэргэммит, 3 хандьыдаакка аккаас биллэриллибит.
«ЯРКО» кирэдьиит биэрэр кэпэрэтиип салайааччыта олунньу ортото бэйэтин хандьыдаатынан биллэрбит Михаил Мерикянов ситэтэ суох быыбардьыт куолаһын хомуйбутунан ааҕыллыбыт. Сокуон этэринэн, бэйэтин хандьыдаатынан биллэрбит киһи уокурук куоластыыр бырааптаах дьонуттан 0,5% итэҕэһэ суох илии баттааһыны хомуйуохтаах. 2021 сыл тохсунньу 1 күнүн туругунан Дьокуускай куорат уокуругар 196 436 куоластыыр дьон баара биллэр. Онон хомуллуохтаах илии баттааһын алын таһыма 983 итэҕэһэ суох буолуохтаах Мярикянов 513 эрэ илии баттааһыны хомуйан аҕалбыт.
“Үтүө дьыалалар” партияттан туруоруллубут хандьыдаат Александр Аммосов биэрбит докумуоннара ситэтэ суоҕунан ааҕыллыбыт, ону таһынан кинини хандьыдаат быһыытынан туоруоруу быыбар сокуонун кэһиилээх ыытыллыбыт.
«Гражданская платформа» партия бэрэстэбиитэлэ ООО «ДВ-Спецтехника» тэрилтэ дириэктэрэ Иван Комаров үөрэҕин туоһулуур докумуона уонна квалификациятын туһунан докуомуоннара хамыыһыйаҕа киирбэтэх, онон бу хандьыдаат эмиэ сыыйыллыбыт.
Ити курдук куорат баһылыгын миэстэтигэр 8 хандьыдаат күрэхтэһэр: Савва Михайлов, Евгений Рябченко, Владимир Федоров, Виталий Обедин, Микаэл Заболотнай, Евгений Григорьев, Илья Паймушкин уонна Айал Прокопьев.
«Саха сирэ» хаһыат, edersaas.ru