БЫЫБАР: Бастакы күҥҥэ Саха сиригэр 103 тыһыынчаттан тахса киһи куоластаата

РФ Госдууматын дьокутааттарын быыбарын бастакы күнүгэр Саха сирин быыбардааччытын 15,66 %-на кытынна диэн эрэгийиэннээҕи Киин быыбардыыр хамыыһыйа бэрэссэдээтэлэ Евгений Федоров иһитиннэрдэ.

«Куоластааһын бастакы күнэ түмүктэннэ. Барыллаан дааннайдарынан, өрөспүүбүлүкэ үрдүнэн 103 648 киһи кытынна, ол аата быыбардааччы — 15,66 %-на», — диэн кини этэр.

Бэрэссэдээтэл этэринэн, быыбар сокуон ирдэбилинэн, санитарнай-эпидемиологическай нуормалары, баһаары утары быраабылалары тутуһан ыытыллалар. Бастакы күҥҥэ учаастактарга кэһии тахсыбытын туһунан иһитиннэрии киирбэтэх.

– Күн аҥаарыгар Быыбар киин хамыыһыйатыгар сокуону кэһиигэ биир да сайабылыанньа, үҥсүү киирбэтэ. Арай кэтээн көрөөччүлэр өттүлэриттэн видеокамералар үлэлэригэр техническэй боппуруостар көтөҕүллэ сырыттылар. Камералары кылгас кэм иһигэр “Ростелеком” хампаанньа көннөрөн биэрбитэ. Хас биирдии учаастакка быыбар хайдах баран иһэрин кэтээн көрө олоробут. Сарсыарда өттүгэр быыбардыыр учаастактарга тэрилтэлэртэн дьон-сэргэ маассабай кэлэн куоластааһына баар этэ. Санатан эттэххэ, “Мобильнай быыбардааччы” ньыманан туһанан эрдэ сайабылыанньа суруйан, хас биирдии киһи билигин баар сиригэр куоластыыр бырааптаах. Ити ньыманан сүрүннээн тохтоло суох үлэлиир тэрилтэ үлэһиттэрэ туһаннылар. Быыбардыыр учаастактарга туох баар быраабыла барыта тутуһуллубута, онон бу – сокуону кэһии буолбатах, – диэн Евгений Федоров этэр.

 Мария Васильева, Андрей Сорокин (СИА) хаартыскалара.