Өрөспүүбүлүкэтээҕи Быыбар киин хамыыһыйатын эппиэттээх үлэһиттэрэ быыбар ыытыллар улуустарынан сылдьан, быыбар хамыыһыйаларын үлэһиттэригэр үөрэтэр сэминээрдэри тэрийдилэр, методическай көмөнү оҥордулар.
edersaas.ru
Ааспыт нэдиэлэҕэ Киин быыбардыыр хамыыһыйа бэрэссэдээтэлин солбуйааччы Иван Андросов уонна иһитиннэрэр-биллэрэр салаа салайааччыта Михаил Неймохов Аллайыахаҕа сырыттылар. Быыбар биир кэлим күнүгэр улуус олохтоохторо улуус баһылыгын уонна улуус Сэбиэтин дьокутааттарын талыахтаахтар. Онон улуустааҕы уонна нэһилиэктэрдээҕи быыбардыыр хамыыһыйалар үлэһиттэрэ эппиэтинэстэрин үчүгэйдик өйдүүр эбиттэр. Быыбар ыытыллар миэстэлэрин быһаарбыттар, быыбардааччылар испииһэктэрин бэлэмнээбиттэр, бүллүтүөннэри оҥорторбуттар. Балаҕан ыйын 8 күнүгэр быыбардыыр учаастакка кыайан кэлбэт кырдьаҕастары уонна инбэлииттэри дьиэлэригэр куоластатарга бэлэмнэр эбит. Сэминээргэ кинилэри таһынан баһаартан сэрэхтээх буолууну уонна бэрээдэги хааччыйар уорган үлэһиттэрэ көхтөөхтүк кытыннылар, ыйытыы да элбэх буолла.
Киин быыбардыыр хамыыһыйа сэкиритээрэ Эльвира Мярикянова уонна быраап салаатын салайааччы Надежда Егорочкина Сунтаарга үлэлээтилэр. Улуус баһылыга Анатолий Григорьевы, улуус Сэбиэтин бэрэссэдээтэлэ Ульяна Попованы кытары көрсөн, быыбар хамыыһыйаларыгар быыбары тэрийиигэ көмөлөһөргө көрдөстүлэр. Бу улууска барыта 16 тыһыынча 673 быыбардааччы, ол иһигэр олохтоох дьаһалта баһылыктарын талыахтаах Сунтаар нэһилиэгэр 7 тыһыынча, Күндээдэҕэ 620 быыбардааччы баар. Улуустааҕы быыбар хамыыһыйатын бэрэссэдээтэлэ Наталья Яковлева, итиэннэ Сунтаар нэһилиэгин быыбардыыр хамыыһыйатын бэрэссэдээтэлэ Николай Иванов, Күндээдэ нэһилиэгин быыбардыыр хамыыһыйатын Василий Саввинов иһитиннэрбиттэринэн, быыбары ирдэбил быһыытынан тэрийиигэ барыта бэлэм эбит. Эльвира Мярикянова уонна Надежда Егорочкина быыбар ыытыллар күнүгэр хамыыһыйалар үлэлиир бэрээдэктэрин сырдаттылар, дьон суругун уонна үҥсүүтүн көрүүгэ хайдах үлэлиири сүбэлээтилэр, туох докумуону уонна хайдах толорорго үөрэттилэр. Ураты болҕомтону быыбар учаастактааҕы хамыыһыйата куоластааһын түмүгүн таһаарарыгар уонна куоластааһын боротокуолун хайдах толороругар уурдулар.
Улуустардааҕы быыбардыыр хамыыһыйалар миэстэтигэр быыбардааччыларга үөрэтэр-өйдөтөр үлэни тиһигин быспакка тэрийэллэр. Ол курдук, Нерюнгритааҕы быыбардыыр хамыыһыйа соторутааҕыта оройуоннааҕы социальнай көмүскэл управлениетын социальнай үлэһиттэригэр, кыаммат кырдьаҕастары уонна инбэлииттэри дьиэҕэ көрөр-истэр дьоҥҥо, итиэннэ инбэлииттэр уопсастыбаларын салайааччыларыгар анаан сэминэр ыытта.Сэминээргэ доруобуйаларынан хааччахтаах дьон, инбэлииттэр быыбардыыр бырааптарын хааччыйыы боппуруоһун тула киэҥ кэпсэтии ыытылынна. Онно дьиэлэригэр куоластыыр дьон испииһэгин чуолкайдаан, быыбардыыр хамыыһыйаҕа түһэрэргэ этилиннэ.
Быыбардыыр хамыыһыйа бэрэссэдээтэлэ Мария Федорова быыбар учаастактардааҕы хамыыһыйаларын чилиэннэригэр быыбардааччыны дьиэтигэр хайдах куоластатары сиһилии быһаарда, ирдэниллэр докумуоннары таба толорууга үөрэттэ. Сэминээр бүтүүтүгэр социальнай көмүскэл управлениетын социальнай үлэһиттэригэр уонна инбэлииттэр уопсастыбаларын салайааччыларыгар биир кэлим быыбар, итиэннэ дьиэҕэ быыбардааһыны тэрийии тустарынан сырдатар методическай матырыйааллары, сайабылыанньалар былааҥкаларын биэрдилэр.
Күндү быыбардааччылар! Балаҕан ыйын 8 күнүгэр, биир кэлим быыбар күнүгэр, тустаах быыбардыыр учаастактаргытыгар тиийэҥҥит, гражданскай иэскитин толоруҥ, талбыт хандьыдааттаргытыгар куоласкытын биэриҥ.
Раиса Сибирякова, «Саха сирэ» хаһыат, edersaas.ru