Саха Өрөспүүбүлүкэтин территориятыгар быыбары бэлэмнээһин уонна ыытыы халандаарынай былаанын быһыытынан, атырдьах ыйын 19 күнүттэн ыраах сытар, мөлтөх суоллаах-иистээх сирдэргэ, балыктыыр учаастактарга итиэннэ таба ыстаадаларыгар, ыраах бириискэлэргэ болдьоҕун иннинэ куоластааһын саҕаланна. Биир бастакынан Өймөкөөн улууһун “Дражник” бириискэтин көмүсчүттэрэ куоластаатылар.
Быыбар ининээҕи аҕытаассыйа чэрчитинэн, бары таһымнаах хандьыдааттар быыбардааччыларын кытары көрсүһүүлэри тэрийэллэр.
Оттон быыбардыыр учаастактарга быыбардааччылар испииһэктэрин чуолкайдааһын ыытыллар. Ааспыт нэдиэлэҕэ учаастактардааҕы быыбар хамыыһыйаларын сэкиритээрдэригэр, бэрэссэдээтэллэригэр аналлаах сэминээрдэр ыытылыннылар.
«Мобильнай быыбардааччы» ситиминэн сайабылыанньалар 43 МФЦ, 35 территориялардааҕы быыбардыыр хамыыһыйалар уонна судаарыстыбаннай (муниципальнай) өҥө порталын нөҥүө ылыллаллар. Күн бүгүҥҥү туругунан, барыта 1402 сайабылыанньа киирдэ: МФЦ-га — 94, территориялардааҕы быыбардыыр хамыыһыйаларга — 442, судаарыстыбаннай (муниципальнай) өҥө порталыгар — 866.
Быыбар киин хамыыһыйатыгар 8(4112) 25-67-77 нүөмэринэн быыбардааччыларга анаан “суһал лиинньийэ” үлэлиир.
Типографияҕа быыбардыыр бүлүтүөннэр бэчээттэнэн бүтэн, улуустарга ыытыллан эрэллэр.
Хаартыскаҕа: «Сахамедиа» РИИХ типографиятыгар саҥа бэчээттэммит быыбар докумуоннарын көрүү-истии.
Раиса Сибирякова, «Саха сирэ» edersaas.ru