Саха Өрөспүүбүлүкэтин Киин быыбардыыр хамыыһыйатын бэрэссэдээтэлэ Алексей Ефимов быыбар барыллаан түмүгэр пресс-конференция биэрдэ.
edersaas.ru
Бастатан туран, өрөспүүбүлүкэ олохтоохторо 51,1 % кыттаннар, быыбар буолбутунан ааҕылынна. Быыбар кэмигэр туох да улахан кэһии тахсыбата, быыбардыыр учаастактарга кэтээн көрөр тэриллэр туруорулланнар, хандьыдааттар уонна политическай баартыйалар өттүлэриттэн уопсастыбаннай кэтээн көрөөччүлэр үлэлээннэр, куоластааһын сиэр быһыытынан, чиэһинэйдик ыытылынна. Өрөспүүбүлүкэ Баһылыгын быыбарыгар түөрт хандьыдаат кыттыбытыттан, барыллааһын быһыытынан (бүлүтүөн 88 %-а ааҕыллыбыт) Айсен Николаев 71,92 %, Виктор Губарев 11,91 %, Владимир Богданов 6,45 %, Гаврил Парахин 6,03 % куолаһы ылбыттар. Онон, Айсен Николаев өрөспүүбүлүкэ олохтоохторун баһыйар үгүс итэҕэллэрин ылан, Ил Дархан буолла!
Араас таһымнаах быыбардар дойду 80 эрэгийиэнигэр ыытыллыбыттара. Уһук Илин федеральнай уокуругу ыллахха, Саха өрөспүүбүлүкэтигэр, Приморскай, Хабаровскай кыраайдарга, Амур, Магадан уобаластарыгар, Чукотка аптаныамынай уокуругар эрэгийиэн баһылыктара талыллыбыттара. Атын эрэгийиэннэргэ быыбар этэҥҥэ эбит буоллаҕына, Хабаровскай кыраайга уонна Приморьеҕа эрэгийиэн баһылыгар хандьыдааттартан хайалара да ирдэнэр 51 %-ы ылбаккалар быыбар хаттаан ыытыллар туруктанна.
Киин куорат баһылыгын быыбарыгар тоҕус хандьыдаат кыттыбытыттан, барыллааһын түмүгүнэн, Сардаана Авксентьева 39,97 %, Александр Саввинов 32,03 %, Иван Степанов 7,38 %, Микаэл Заболотнай 7,18 % куолаһы ыллылар.
Ил Түмэн быыбарыгар өрөспүүбүлүкэтээҕи испииһэккэ 403 хандьыдааты хабан киирсибит баартыйалартан “Биир ньыгыл Арассыыйа” политическай баартыйа Саха сиринээҕи салаата 51,29 %, Арассыыйа Федерациятын коммунистическай баартыйатын Саха сиринээҕи салаата 19,36 %, “Сиэрдээх Арассыыйа” баартыйа Саха сиринээҕи салаата 16,14 %, ЛДПР Саха сиринээҕи салаата 9,45 % куолаһы ыллылар. Оттон биир мандааттаах быыбардыыр уокуруктарынан туруоруллубут 129 хандьыдааттан ким төһө куолаһы ылбыта ааҕылла сылдьар. Билиҥҥитэ бэйэлэрин уокуруктарыгар Алевтина Эверстова, Алексей Осипов, Владислав Дмитриев, Андрей Лебедев, Сергей Черных хоппуттара биллэр.
15 улуус дьаһалтатын баһылыгар 58 хандьыдаат турбутуттан Алдаҥҥа үлэлии олорор баһылык Северин Поздняков (39,64 %), Анаабырга үлэлии олорор баһылык Иван Семенов (52,97 %), Үөһээ Халымаҕа бэйэтэ туруоруммут Анастасия Яхонтова (42,22 %), Горнайга үлэлии олорор баһылык Никита Андреев (77,97 %), Кэбээйигэ Иван Левин (56,21 %), Муомаҕа Иван Павлов (81,22 %), Намҥа Юрий Слепцов (86,89 %), Өлөөҥҥө үлэлии олорор баһылык Александр Иванов (94,76 %), Тааттаҕа үлэлии олорор баһылык Михаил Соров (80,07 %), Уус Алдаҥҥа үлэлии олорор баһылык Алексей Федотов (64,88 %), Уус—Маайаҕа бэйэтэ туруоруммут Александр Антипин (38,73%), Усуйаанаҕа үлэлии олорор баһылык Георгий Федоров (44,30 %), Эбээн-Бытантайга Гаврил Горохов (50,45 %) кыайбыттар. Икки улууска, Мирнэйгэ уонна Чурапчыга бүлүтүөннэр ааҕыллан бүтэ иликтэр.
Раиса Сибирякова, «Саха сирэ», edersaas.ru