Атырдьах ыйын 19 күнүттэн саҕаламмыт болдьоҕун иннинэ куоластааһыҥҥа өрөспүүбүлүкэ 27 улууһугар түөрт тыһыынча кэриҥэ быыбардааччы хабыллыахтаах. Күн бүгүҥҥү туругунан, барыта 1 тыһ. 922 киһи болдьоҕун иннинэ куоластаата.
edersaas.ru
Учаастактааҕы быыбардыыр хамыыһыйалар таба ыстаадаларыгар, балыктыыр учаастактарга уонна артыалларга көлө араас көрүҥүнэн — массыынанан, мотуордаах оҥочонон итиэннэ бөртөлүөтүнэн – тиийэннэр, болдьоҕун иннинэ куоластааһыны тэрийэллэр. Төгүрүк сыл устата ыраах ыстаадаларга олорон үлэлиир табаһыттар, көмүс хатырыктааҕы бултуур балыксыттар итиэннэ сир баайын көрдүүр оробуочайдар кими Ил Дарханынан, кими Ил Түмэн дьокутаатынан, кими улуус баһылыгынан, дьокутаатынан талалларын быһааран, бэйэлэрин гражданскай иэстэрин толороллорун хааччыйаллар. Кинилэр дьону быыбардаталларын таһынан табаһыттарга, балыксыттарга наадалаах туттар тэрили, эми-тому, буостаны илдьэллэр, төннөллөрүгэр ыалдьыбыт дьону, төрөппүттэрин кытары ыстаадаларга, учаастактарга сайылаабыт оҕолору бөһүөлэктэргэ аҕалаллар.
Нерюнгри оройуонун Иенгратааҕы учаастагын быыбардыыр хамыыһыйатын бэрэссэдээтэлэ Ирина Кулакова, кинини солбуйааччы Екатерина Ильина бу күннэргэ Нерюнгриттан 200 км ыраах баар «Пламя» артыалга, Чульман үрэҕинэн көһө сылдьар Гиркис аҕа ууһун общинатыгар итиэннэ Алдан баһынан сылдьар алтыс нүөмэрдээх ыстаадаҕа тиийэн болдьоҕун иннинэ куоластааһыны тэрийдилэр.
Геологтар уонна табаһыттар оройуоҥҥа бастакынан Ил Дарханы итиэннэ Нерюнгри оройуоннааҕы сэбиэтин дьокутааттарын таллылар. Бөртөлүөт төннөрүгэр ыстаадаттан оскуолаҕа үөрэнэр уон икки оҕону бөһүөлэккэ аҕалла.
Раиса Сибирякова, «Саха сирэ» edersaas.ru.