Бүгүн Саха сиригэр араас таһымнаах быыбардарга хандьыдааттары туруоруу түмүктэнэр. Быйыл куоластааһын биир күнэ Саха сирин 25 оройуонугар уонна “Жатай бөһүөлэгэ” куорат уокуругар ыытыллыаҕа. Эрэгийиэҥҥэ уопсайа 57 быыбардыыр хампаанньа баар.
Оройуоннар таһымнарыгар түөрт муниципальнай тэриллиигэ быыбар ыытыллыаҕа. Аллайыаха, Өлүөхүмэ, Аллараа Халыма оройуоннарыгар уонна Жатай бөһүөлэгэр баһылыктары талыахтара. Аллайыахаҕа, Өлүөхүмэҕэ уонна Жатайга оройуон сэбиэтин дьокутааттарын талыахтара. Оройуон таһымнаах дьокутааттарга эбии быыбардара Дьааҥыга, Мэҥэ Хаҥаласка уонна Аллайыаха, Өлүөхүмэ, Аллараа Халыма оройуоннарыгар уонна Жатай бөһүөлэгэр баһылыктары Уус Маайа оройуоннарыгар, хаттаан – Нерюнгри оройуонугар ыытыллыахтара.
Маны сэргэ балаҕан ыйын 8 күнүгэр нэһилиэктэр уонна поселениелар 18 баһылыктарын Булуҥҥа, Үөһээ Бүлүүгэ, Ленскэйгэ, Мэҥэ Хаҥаласка, Намҥа, Ньурбаҕа, Өлүөхүмэҕэ, Орто Халымаҕа, Сунтаарга, Тааттаҕа уонна Уус Маайа оройуоннарыгар куоластыахтара.
Киин быыбардыыр хамыыһыйа чахчытынан, от ыйын 27 күнүгэр 24 хандьыдаат туруорунна, кинилэртэн 11-рэ эрэ баартыйалар бэрэстэбиитэллэринэн буолаллар, атыттар – бэйэлэрин туруоруннулар. “Биир ньыгыл Арассыыйа”, “Сиэрдээх Арассыыйа”, ЛДПР уонна КПРФ бэйэлэрин хандьыдааттарын туруордулар.
Аллайыаха улууһун баһылыгын дуоһунаһыгар Яков Елисеев (“Биир ньыгыл Арассыыйа”), Егор Уваров (КПРФ) уонна Виталий Слепцов күрэстэһиэхтэрэ. Ол эрээри кинилэр билиҥҥитэ дьиҥнээхтик регистрациялана иликтэр.
Жатайга алта киһи баһылык буолар баҕалааҕын биллэрдэ. Кинилэртэн сорохторун Саха сирин олохтоохторо куорат мээрин ааспыт быыбарыттан билэллэр. Ол курдук, Микаэл Заболотнай (КПРФ) уонна Владислав Теппор (ЛДПР) быйыл даҕаны мэр буолар баҕалаахтар. “Биир ньыгыл Арассыыйа” Жатай баһылыгын ОДьКХ боппуруостарыгар солбуйааччы Владислав Гладышевы туруорда, “Сиэрдээх Арассыыйаттан” Мичил Николаев турунна. Быыбарга Дьокуускайдааҕы аэрогеодезическай тэрилтэ начаалынньыга Анатолий Ощепков уонна уокурук баһылыгын социальнай боппуруостарга бастакы солбуйааччы Елизаевета Исаева эмиэ кыттыахтара.
Бу хандьыдааттартан Владислав Теппор уонна Владислав Гладышев регистрацияланнылар.
Аллараа Халыма оройуонугар аҕыс киһи баһылык буолар баҕалаах. Ол курдук, Владислав Бандеров, оройуон сэбиэтин дьокутаата Альбина Винокурова, оройуон баһылыгын бастакы солбуйааччы Катерина Дмитриева, биэнсийэлээх Дмитрий Золотуев уонна адвокат Сергей Трусов.
Баартыйалартан үс хандьыдаат – оройуон сэбиэтин дьокутаата Рамиль Алимов (КПРФ), ГосДуума дьокутаатын Селезнев көмөлөһөөччүтэ Евгений Рябченко (ЛДПР) уонна быстах кэмҥэ үлэтэ суох Валерий Сентяков (“Биир ньыгыл Арассыыйа”) туруннулар.
Билигин хамыыһыйа Дмитриеваны, Алимовы уонна Бандеровы регистрациялаата.
Өлүөхүмэҕэ эмиэ сытыы киирсии буолара күүтүллэр. Манна сэттэ хандьыдаат баар. Баартыйалартан иккиэлэр – Михаил Еникеев (ЛДПР) уонна Сулустаана Мыраан (“Сиэрдээх Арассыыйа”), кини билигин Ил Түмэн дьокутаата.
Биэс киһи бэйэлэрин хандьыдаат быһыытынан туруоруннулар. Ол курдук, үлэтэ суох Илларион Авелев, “Кладовая Олекмы” генеральнай дириэктэрэ Николай Ефимов – Владимиров, “Куорат баанньыктара” МУП дириэктэрэ Василий Поскачин уонна Физтехпроблемаларга институт сотруднига Николай Харбин. Оттон Константин Шестакову регистрациялаабатылар. Билиҥҥитэ Василий Поскачин эрэ регистрацияланна.
Оройуон таһымнаах дьокутаат буоларга биэс баартыйа киирсэр: “Биир ньыгыл Арассыыйа”, “Сиэрдээх Арассыыйа”, КПРФ, ЛДПР уонна “Арассыыйаны чөлүгэр түһэрэр баартыйа”. От ыйын 27 күнүнээҕи туругунан, 96 хандьыдааттаахпыт. Кинилэр 61 мандаат иһин киирсиэхтэрэ. Санатан эттэххэ, Аллайыаха уонна Өлүөхүмэ оройуоннарыгар былаас бэрэстэбиитэллээх уорганнарыгар быыбар булкаас тиһигинэн барыаҕа (баартыйа испииһэгэ уонна биир мандааттаахтар), атыттарга – мажоритарнай тиһигинэн.
Бүгүҥҥү туругунан “Биир ньыгыл Арассыыйа” Өлүөхүмэттэн уратыларга хандьыдааттарын туруорда. КПРФ Дьааҥыга, Өлүөхүмэҕэ уонна Уус Маайа оройуонугар киһитэ суох. “Сиэрдээх Арассыыйа” Дьааҥы, Нерюнгри, Мэҥэ Хаҥалас оройуоннарыгар, ЛДПР – Нерюнгри оройуонугар уонна Жатайга, “Партия Возрождения России” – Өлүөхүмэҕэ уонна Аллайыахаҕа оройуон сэбиэттэригэр бэйэлэрин бэрэстэбиитэллэрин киллэрэ сатыыллар.
Хандьыдааттары туруоруу бүгүн, от ыйын 29 күнүгэр, 18.00 түмүктэниэҕэ.
СИА.