Бэлиитикэ

15:00 чаастааҕы дааннайдарынан, Саха сирин быыбардааччытын 10 %-на куоластаата

СӨ Киин быыбардыыр хамыыһыйатын сэкирэтээрэ Эльвира Мярикянова брифиҥҥэ күн бастакы аҥаарыгар быыбар хайдах ааспытын иһитиннэрдэ.

Уокуруктааҕы быыбардыыр хамыыһыйа испииһэгэр 661 863 быыбардааччы баара биллэр. Онтон балаҕан ыйын 17 күнүн 15:00 чааһыгар 66 636 киһи — 10,07 % куоластаабыт.

«Бүгүн — быыбардыыр үс күммүт бастакы күнэ. Сарсыарда аҕыс чаастан бары быыбардыыр учаастактар арыллыбыттара. Үгүс хоту оройуоҥҥа хаар, ардах түстэр даҕаны, олохтоохтор көхтөөхтүк кытталларын бэлиэтиибит. Саха сиригэр бастакынан Муома, Аллайыаха, Өймөкөөн уонна Халыма улуустара куоластаан саҕалаабыттара.

Бүгүн РФ Госдууматыгар дьокутааттары быыбардыырбыт таһынан, Саха сирин норуодунай дьокутаатыгар эбии быыбар ыытыллар — Университеттааҕы уонна Халыма-Индигиир биир мандааттаах быыбардыыр уокуруктарыгар. Итиэннэ 76 муниципальнай быыбардыыр хампаанньа буола турар. Холобура, Абый Белай Горатын уонна Аллараа Халыма Черскэйин олохтоохторо алталыы бүлүтүөнү, Эдьигээн уонна Өймөкөөн сорох олохтоохторо биэстии бүлүтүөнү толороллор.

Анаабырга, Булуҥҥа, Өймөкөөҥҥө, Өлөөҥҥө номнуо хас бэһис киһи куоластаата», — диэн Эльвира Мярикянова эттэ.

СИА хаартыската.

0
0