“Быыһааччыларга, мууһу дэлби тэптэрээччилэргэ, нэһилиэнньэҕэ махтанабыт!”
Өлүөхүмэ улууһун Хоро сэлиэнньэтэ ыксаллаах балаһыанньаҕа киирэн таҕыста.
Ол да буоллар, “норуот күүһэ-көмүөл күүһэ” дииллэринии, олохтоохтор турунан быһыт оҥорон, дэриэбинэлэрин ууттан көмүскээтилэр. Бу туһунан биһиэхэ олохтоох дьаһалта исписэлииһэ Ирина Данилова иһитиннэрдэ.
Мууһу дэлби тэптэрээччилэр бэҕэһээ тиийэн үлэлээбиттэрин түмүгэр, балаһыанньа этэҥҥэ буолан эрэр эбит.
— Иккис тэптэриилэрин кэннэ түүн 2 чаастан уу түһэн барбыта. Сарсыарда 5 чаас саҕана ууга барбыт дьиэлэр босхоломмуттар этэ. Билигин сэлиэнньэ иһигэр балаһыанньа туһунан кэпсээтэххэ, түөрт маҕаһыыммыт үлэлии турар. Быстах кэмҥэ дьону олордор икки пууммут эмиэ. Бүгүн күнүс 2 чаастан тэриллибит хамыыһыйа ууга барбыт ыаллар төһө хоромньуну көрсүбүттэрин ааҕыахтара, сүөһүнү-аһы учуоттуохтара. Биллэн турар, маннык халаан уута кэлбэтэҕэ ыраатта. Урут 1964 сыллаахха маннык уу кэлэ сылдьыбыта дииллэр. Ол сылга оскуоланы эҥин ылбыт эбит. Быйыл уу оскуола тиэргэнигэр кыратык киирэ сырытта. Халаан кэмигэр быыһааччылар, мууһу дэлби тэптэрээччилэр, салайааччылар кэлэн абыраатылар. Сүбэ-ама да биэрдилэр. Онон олохтоох дьаһалта аатыттан кинилэргэ барыларыгар махтанабыт. Уонна олохтоохторбутугар эмиэ. Быһыты оҥорон, бириэмэни сүүйэн, бары биир киһи курдук туруммуттарын иһин, — диэтэ төлөпүөнүнэн кылгастык кэпсэтиибитигэр Ирина Геннадьевна.
Бэлэмнээтэ Женни Стрюкова