Социальнай ситимнэринэн тарҕаммыт Эбээн Бытантайга саха сүөһүтүн иитэр тэрилтэ ынахтара ыран охтоору туралларын туһунан иһитиннэриигэ ыйытык ыыппыппытыгар, Тыа хаһаайыстыбатын министиэристибэтин пресс-сулууспата маннык хардарда.
edersaas.ru
«Батсаап ситимигэр сиэрэ суохтук тарҕана сылдьар Эбээн Бытантай улууһугар саха сүөһүтүн иитэр «Бытантай» тэрилтэ ырыганнаабыт сүөһүлэрин туһунан иһитиннэрии олус ыарахан кыстык ааһан эрэрин түмүгэ буолар. Эбээн Бытантай улууһугар очуос таас хайаларын быыһыгар бүгэн, атын боруодалары кытта буккуспакка, ыраас хаанын сүтэрбэтэх сахабыт ынаҕын иитэн олорор «Бытантай» хаһаайыстыбаҕа хаһааҥҥытааҕар да ыарахан кыстык ааста диэн бэлиэтиэххэ наада. Ол сүрүн биричиинэтэ – от эрдэ хагдарыйан, хаачыстыбата мөлтөөн, сүөһү туругар охсубута буолар. Эбиитин, оттооһун саҕаланыытыгар тэрилтэ үлэһиттэрэ пресс-подборщигы сатаан табан үлэлэппэккэ, технология кэһиллибитэ эмиэ баар.
Санатан эттэххэ, тыа хаһаайыстыбатын миниистирэ Александр Атласов, «Саха сүөһүтэ» хааһына генофонднай тэрилтэтин дириэктэрэ, АККОР бэрэсидьиэнэ Александр Артемьев, бэтэринээрийэ департаменын иниспиэктэрэ Артем Бурцев, «Сахаагроплем» сүрүннүүр зоотехнига Семен Заровняев кулун тутарга Эбээн Бытантайга бара сылдьан, тэрилтэ үлэтин-хамнаһын билсэн кэлбиттэрэ. Үлэһиттэргэ сүбэ-ама, дьаһал биэрбиттэрэ.
Ити сырыы түмүгүнэн, от хаачыстыбата мөлтөҕүн учуоттаан, Дьокуускай куораттан 20 туонна комбикорм, Чурапчыттан 23 туонна күөх от тиэрдиллэн, эбиэһинэн хааһы оҥоһуллан, тэрилтэ сүөһүлэрэ күөххэ үктэнэллэригэр көмө буолла. Ол да үрдүнэн, хомойуох иһин, мөлтөөбүт сүөһү баара биллэр. Манна даҕатан эттэххэ, ситэтэ суох дьаһаллаах салайааччыга миэрэ ылыллан турар. Билигин Эбээн Бытантайдааҕы салааны «Саха сүөһүтэ» хааһына генофонднай тэрилтэтигэр сыһыарар сыалтан баайы-дуолу, сүөһүнү, малы-салы ааҕыы уонна туттарсыы үлэтэ бара турар. Бу күннэргэ тэрилтэҕэ саҥа салайааччы ананыаҕа. Оттон үлэһиттэргэ күн бүгүн туох баар алҕастары туоратар сорук турар.
Тыа хаһаайыстыбатыгар, производствоҕа буоларын курдук, сүөһү уонна сылгы иитиитин салаатыгар чэпчэки кыстык диэн хаһан да суох. Онон сиэттэрэн бу тиҥээн турар ыарахан кэмҥэ тэрилтэҕэ ыарахан кыстык түмүгүн күүркэтиилээхтик ыһа-тоҕо тарҕаппаккытыгар, бэйэ-бэйэҕитигэр убаастабыллаахтык, харыстаһан сыһыаннаһаргытыгар ыҥырабыт!»
Раиса Сибирякова, «Саха сирэ» хаһыат, edersaas.ru