Cуһал дьаһал ыллыллан, “Бытантай” сүөһүлэрин туруга тупсан эрэр (видео)
Бэҕэһээ социальнай ситимнэринэн Эбээн Бытантай улууһугар саха ынаҕын иитэр тэрилтэ сүөһүлэрэ ыран охтоору туралларын туһунан көрдөрөр видео тарҕанан, үгүс киһи сүрэҕин аймаабыта.
edersaas.ru
Санатан эттэххэ, саха сүөһүтүн иитиигэ идэтийэр “Бытантай” судаарыстыбаннай бүддьүөт тэрилтэтэ бу дьыл муус устар 1 күннээҕи чахчынан, икки салаанан 236 сүөһүлээх, ол иһигэр 78 ыанар ынахтаах. Баатаҕай Алыытыгар баар салааҕа 2018 сыллаахха 120 миэстэлээх, толору хааччыллыылаах комплекс тутуллан үлэҕэ киирбитэ. Бачча үчүгэй хотоҥҥо киирбит хаһаайыстыба үүккэ үлэлээн, кэлэр өттүгэр астыыр сыаҕын туттар бэрт кэскиллээх былааннаах этэ.
Биһиги ити видео тарҕанаатын кытары тута сөрөөн, Эбээн Бытантай улууһун дьаһалтатыгар ыйытык оҥордубут. Онуоха тыа хаһаайыстыбатын управлениетын начальнига Сергей Аликов маннык хоруйдаата:
– Ааспыт сайын кураантан уонна ойуур баһаарыттан тэптэрэн, дьоммут онно хайдан, оппут хаачыстыбата кырдьык мөлтөх этэ. Кыһын элбэх сүөһү ырыганнаабыта. Онуоха суһал дьаһалы ылан, Чурапчыттан 23 туонна алаас күөх отун, Дьокуускайтан комбикорм, эбиэс, туус уонна аһылык эбиилигин атыылаһан аҕалан, оскуолалар уонна детсадтар көмөлөрүнэн ас тобоҕун хомуйан эбии аһатыыны тэрийбиппит. Урбаанньыт Валентина Семеновна уон биир куул ирииһи, хас да дьааһык галеты биэрбитэ. Кулун тутар ыйтан кырдьаҕас зоотехник Светлана Дмитриевна Слепцованы аһылык рационун оҥорорго көмөлөс диэн көрдөһөммүт, кини сүбэтинэн-аматынан эбиэстээх ирииһи ууга оргутан, «болтушка» оҥорон аһатаммыт, балаһыанньа арыый көннө, 32 ынах төрөөтө. Бэтэринээринэй управление чахчытынан, билигин 60-ча ынах мөлтөһүөр (ортону аннынан) туруктаах, оттон ньирэйдэр уонна субаттар этэҥҥэлэр. Мөлтөх сүөһүлэри туспа тутан, күүскэ аһатан турабыт. Сөп буолар от да, комбикорм да баар. Комплекска эдэр дьон үлэлииллэр, кинилэри сүөһүнү куһаҕаннык көрөҕүт, кыһаммаккыт диир сыыһа буолуо. Түүҥҥү өттүгэр дьуһуурустуба олохтоон, хоно сылдьан үлэлииллэр. Кустуурдааҕы салааҕа баар сүөһүлэр туруктара куһаҕана суох. Баатаҕай Алыытыгар баар салаа да сүөһүлэрэ бэттэх кэлиэхтэрэ диэн эрэнэбит.
Раиса Сибирякова, «Саха сирэ» хаһыат, edersaas.ru