Арассыыйаҕа оҕо босуобуйатын ылыы быраабылатын судургутуттулар. Ыам ыйын 12 күнүттэн босуобуйаны ыларга сайабылыанньаны олорор сиргинэн эрэ буолбакка, ханнык баҕарар куоракка тиийэн биэриэххэ сөп буолла. Бу күнтэн ыла оҕо босуобуйаларын биэриигэ уларытыылары киллэрэр туһунан сокуон күүһүгэр киирдэ. Владимир Путин ыам ыйын 1 күнүгэр сокуоҥҥа илии баттаабыта.
Урут босуобуйаны биэрэргэ бырапыысканы ирдиир эбит буоллахтарына, билигин быстах регистрация да ирдэммэт буолла. Оҕо төрөөтө да, сайабылыанньаны ылан, босуобуйа ааҕыллан барар.
Босуобуйа дьиэ кэргэн хас биирдии чилиэнигэр тиксэр ыйдааҕы орто дохуота тиийинэн олоруу алын кээмэйин балтарааҕа төгүллэммититтэн кыра буоллаҕына эрэ, төлөнөр. Холобур, Саха сиригэр тиийинэн олоруу алын кээмэйэ ортотунан 16,6 тыһ. солк. тэҥнэһэр.
Билигин эрэгийиэн салалтата бэйэтэ быһаарар: оскуолаҕа аһыырга уонна оҕо босуобуйатыгар төһө сууманы бүддьүөттэн биэрэрин. Бу сокуон эргэрдэ, уларытыахха наада, эрэгийиэннэргэ барыларыгар биир стандартары киллэриэххэ диэн экспердэр этэллэр эбит.
Сотору кэминэн туох баар судаарыстыбаннай төлөбүрдэри “Мир” каартаҕа көһөрүөхтээхтэр. Бу иннинэ бүддьүөт үлэһиттэрин хамнастарын уонна биэнсийэни бу каартаҕа көһөрбүттэрэ.
Муус устарга премьер-министр Дмитрий Медведев 2020 сылтан оҕо 1,5 сааһыттан 3-гэр диэри ылар босуобуйатын кээмэйин улаатыннарыахха диэн эппитэ. Чахчы, ийэ оҕото балтараатыгар диэри ылар босуобуйата ботуччу соҕус буоллаҕына, бу сааһын туолла да, тугу да ылбат. Онон ийэ үлэҕэ тахсарга күһэллэр, кырачаанын көрөр киһини буларга, оҕо ыарыйдаҕына, о.д.а. элбэх эрэйи көрсөр. Бу кэмҥэ оҕо босуобуйата үрдээтэҕинэ, дьиэ кэргэҥҥэ улахан көмө буолуо этэ.
Ангелина Васильева, “Саха сирэ” хаһыат, edersaas.ru