«Усулуобуйа барыта баар», — дииллэр бырамыысыланнаска үлэлиир саха уолаттара
Саха ыччата бырамыысыланнаска күүстээхтик кимэн киириитигэр «Навахту14» бырайыак төһүү күүс буолла. Олохтоох каадырдар бырамыысыланнаска үлэлии сылдьаллар. Нерюнгригэ «Колмар» тэрилтэҕэ үлэлии сылдьар ыччаты кытта кэпсэттибит.
Эльдар Турантаев, Нерюнгритээҕи «Колмар» тэрилтэҕэ хайа маастара:
— Мин 2015 сыллаахха оскуоланы бүтэрбитим. 2014 сыллаахха «Саха ыччатын — бырамыысыланнаска” диэн “Эдэр саас” хаһыат бырайыагар биһиги кылаастан төрдүө буолан кыттыбыппыт. Оччолорго чохтоох Нерюнгрини аан бастакыбын көрбүтүм, тоҕо эрэ ити бырамыысыланнай эбийиэктэри көрө сылдьан улааттахпына эмиэ маннык үлэлиирим буолуо дии санаабытым. Ити кэнниттэн мин Мииринэйгэ ХИФУ филиалыгар «Горная машина и оборудование» диэн идэҕэ үөрэнэ киирбитим. Алта сыл үөрэнэн баран бу ааспыт саас Нерюнгригэ «Колмар» тэрилтэҕэ хайа маастарынан үлэлээн саҕалаабытым. Онон оскуола оҕолоругар олус туһалаах бырайыак этэ диэн бэлиэтиэхпин баҕарабын, киһи инникитин идэ таларыгар, чопчу быһаарынарыгар итинник тэрилтэлэри иһиттэн көрүү улахан көмөлөөх эбит.
Айаал Петров, Нерюнгритээҕи «Колмар» тэрилтэҕэ хайа монтажнига:
— Мин Нам улууһун Маймаҕа нэһилиэгиттэн төрүттээхпин. Оскуоланы 2010 сыллаахха бүтэрбитим. “Навахту14” диэн Петр Чехордун бырайыагынан анал кууруска үөрэнэн баран горнопроходчигынан үлэлээбитим. Алта ый үлэээн баран горномонтажник буоллум. Анал кууруска бу үлэлии сылдьан үрдүттэн үөрэнэбин. Бастаан үлэлии кэлэн баран Чульмаҥҥа уопсайга олорбуппут, онтон түөрт-биэс ый буолан баран туспа хос куортамнаан көспүтүм. Үлэлиир сирбит Чульмантан салгыы, тэйиччи баар. Бэрээдэги кытаанахтык көрөллөр, хонтуруоллууллар. Манна, «Колмарга» сахалар элбээтибит. Үлэлиир усулуобуйа барыта баар.
Ульяна ЗАХАРОВА.