Бырамыысыланнаска үлэҕэ ыҥыраллар

Бөлөххө киир:

«ПРОконсолидация – Якутия» диэн эрэгийиэн иһинээҕи бырайыак аны федеральнай таһымҕа таҕыста. Бу бырайыагы өрөспүүбүлүкэ салалтата көҕүлээн тэрийбитэ. Былаан быһыытынан, аны бырайыагы РФ Арктическай сиригэр-уотугар киэҥник тарҕатыыга үлэ ыытыллара күүтүллэр.

Кулун тутар 11 күнүгэр Норильск куоракка идэҕэ туһаайар министиэристибэлэр, ПАО “Норникель” диэн бөдөҥ хампаанньа кыттыылаах олохтоох уонна анал үөрэхтээх, идэлээх каадырдары үлэҕэ угуйар соруктаах төгүрүк остуол ыытыллыбыта. Бу тэрээһиҥҥэ икки эспиэр ыҥырыллыбыттан биирэ бэйэбит уолбут “ПРОконсолидация – Якутия” салайааччыта Петр Чехордун сырытта.

Тэрээһин сүрүн соругунан хоту сиргэ үлэлиэн сөптөөх, анал үөрэхтээх ыччаты угуйуу буолар. Биһиги дойдубут килиимэтэ, олорор услуобуйата Норильск куораты кытта ханыылаһар. Онон «Навахту14» диэн бырайыак ситимнээх ньымата үгүс дьон интэриэһин тарта. «Төһө да билигин Арассыыйаҕа уустук кэм буоллар, урукку кыһалҕаны быһаарарга саҥалыы көрүү наада,” — диэн Петр Чехордун этэр.

«Навахту14» бырайыак олохтоох ыччат бырамыысыланнас салаатыгар үлэлииригэр тирэх уонна эрэгийиэн бырамыысыланнаһыгар “Олохтоох каадыры – бырамыысылыннаска” диэн өрөспүүбүлүкэтээҕи бырагыраама сүнньүнэн тэриллибитэ. Билигин бырайыак хайысхатын кэҥэтэн, атын улахан хампаанньалыры кытта үлэлэһэр соруктаах. Ол курдук идэ ыларга үөрэтии, үлэҕэ киирэргэ мэдиссиинэ өттүнэн көрдөрүнүү, үлэһит олорор, үлэлиир усулуобуйатын тэрийэр үгүс боппуруоһу быһаарар кыахтаах. Бырайыак аҥардас дьарыктаах буолуу киинигэр учуокка эрэ турбут дьоҥҥо буолбакка, үлэлээх эрээри атын хайысхаҕа бэйэтин боруобаланан үрдүк хамнастаах үлэҕэ барыан баҕалаахтарга эмиэ көмөлөһөр.

Үлэҕэ киириэн баҕалаахтар сайаапкаҕытын www.навахту14.рф саайтка, 8(4112)24-05-08, 89148298198 нүөмэрдэргэ эрийэн хаалларыаххытын сөп.

Ульяна ЗАХАРОВА.

+1
0
+1
0
+1
0
+1
0
+1
0
+1
0
+1
0