Бырамыысыланнаска киһи өлүүлээх түбэлтэлэр тахса тураллар
Ахсынньы 14 күнүгэр Социальнай-үлэ сыһыаннарын сүрүннүүр өрөспүүбүлүкэтээҕи үс өрүттээх хамыыһыйа мунньаҕар кэккэ боппуруостары көрдүлэр.
Бырамыысыланнас миниистирин солбуйааччы Никита Шепелев дакылаатыгар этиллэринэн, алмааһы, чоҕу, ньиэби хостуур тэрилтэлэргэ киһи өлүүлээх саахаллар тахса тураллар. “АЛРОСА” хампаанньа Удачнайдааҕы руднигар эстии тахсан, киһи өлбүтэ. Быһылааны чинчийбит хамыыһыйа сүрүн биричиинэнэн технологическай хаамыыга кэһиллии баарын, эһэр үлэлэри ыытар салайааччы өттүттэн хонтуруол суоҕун ааттаабыта.
Чоҕу хостуур тэрилтэлэргэ бу сыл 9 ыйыгар 6 эчэйии түбэлтэтэ баар, биир киһи суорума суолламмыт. Бу түбэлтэ төрүөттэрэ быһаарыллыбыттар, хатыламматын курдук миэрэлэр ылыллыбыттар, буруйдаах дьон эппиэккэ тардыллыбыттар.
Ньиэп-гаас эйгэтигэр 9 ый иһигэр 2 түбэлтэ тахсыбытыт, биир киһи суорума суолламмыт. Геология эйгэтигэр 2 киһи эчэйбит.
Мунньахха, Бырамыысыланнас министиэристибэтэ үлэҕэ куттал суох буолуутугар ситэтэ суох үлэни ыытара бэлиэтэннэ.
—Үс сылга биирдэ бэрэбиэркэни ыытаргыт туһата суох. Бу түбэлтэлэри туоратарга туох миэрэлэри ыллыгыт? Быһылаан буоларын эрэ күүтэн олорор курдуккут. Ону эрдэттэн сэрэтэр туох үлэ ыытылларый? Ыарахан усулуобуйаҕа үлэҕэ куттал суох буолуутугар систиэмэлээх үлэ баар буолуохтаах, — диэн бырабыыталыстыба бэрэссэдээтэлин солбуйааччы Ольга Балабкина эттэ.
Салгыы СӨ үлэҕэ, социальнай сайдыыга миниистирэ Елена Волкова эстибит тэрилтэлэр хамнаска иэстэрин төлүүр туһунан дакылаатын иһиттилэр.
Ангелина Васильева, “Саха сирэ” хаһыат, edersaas.ru