«CASE-IN» аан дойдутааҕы инженернэй чөмпүйэнээт устудьуоннар лигаларыгар «Хайа дьыалата», «Геологическай чинчийии» хайысхатынан «АЛРОСА» хампаанньа стратегическай партнер быһыытынан кыттыаҕа. Арассыыйа уонна Тутулуга суох судаарыстыбалар үөрэх 56 кыһатыгар марафон сүүмэрдиир түһүмэҕин Томскайдааҕы политехническай университекка биллэрбиттэрэ. Устудьуоннар күрэс былдьаһыыларыгар Бүлүүтээҕи хайаны чинчийэр эспэдииссийэттэн Евгений Гончаров кыттыаҕа.
edersaas.ru
«АЛРОСА» маннык чөмпүйэнээккэ бастакытын кыттар. Цифровизация үйэтигэр бырамыысыланнаска инновационнай бырайыактар кимэн киирэллэр. Онон оҥорон таһаарыыны саҥардарга өрөбөлүүссүйэ оҥорорго хампаанньа улахан интэриэстээх. Итини олоххо киллэрэргэ саҥа технологияны баһылаабыт аныгы үйэ инженердэрэ наадалар. Биһиги кыттааччылартан үлэни сонун хараҕынан көрүүнү, соһуччу быһаарыыны күүтэбит», — диэн чөмпүйэнээт аһыллыытыгар Евгений Гончаров санаатын эттэ.
Инженернэй өркөн өй тургутугун ааспыт, аныгылыы көрүүлээх талааннаах устудьуоннарга «АЛРОСА» хампаанньа быраактыка тэрийэн, инникитин үлэҕэ ыларга бэлэмин биллэрдэ.
Чөмпүйэнээт аһыллыытын ютубка https://www.youtube.com/watch?v=-_9-qcU-z9c&index=5&list=PLCUqYQZtCM50izm4P9MPLyU03yfPAKT40&t=0s киирэн көрүөххүтүн сөп.
Инженернэй кейстэри талар «CASE-IN» аан дойдутааҕы чөмпүйэнээт оскуола оҕолорун, устудьуоннар уонна эдэр үлэһиттэр ортолоругар ыытыллар. Тэрээһин сыала-соруга: оттук-энергетика, нефтехимическэй, минерально-сырьевой салааҕа цифровой эйгэҕэ көһүүнү сатаан тэрийэр тэхиньиичэскэй өттүнэн дьоҕурдаах эдэр исписэлиистэри сүүмэрдээһин, кинилэри үлэнэн хааччыйыы.
Күрэхтэһии түмүгэ Москва куоракка 2019 сыл ыам ыйын 31 күнүгэр биллиэҕэ. «CASE-IN» аан дойдутааҕы устудьуоннар лигаларыгар 5000 устудьуон кыттыа. Сүүмэрдиир түһүмэхтэр Арассыыйа, Беларусь, Казахстан, Кыргызстан, Таджикистан үөрэҕин кыһаларыгар ааһыахтара. Устудьуоннар хамаандалара алта хайысханан: геологическай чинчийиигэ, хайа дьыалатыгар, металлургияҕа, ньиэп-гаас бырамыысыланнаһыгар, нефтехимияҕа, электроэнергетикаҕа күрэхтэһиэхтэрэ.
Марианна ТЫРТЫКОВА, «Саха сирэ» хаһыат, edersaas.ru