Саха сирин араас оройуоннарын эдэр үлэһиттэрэ бырамыысыланнас тэрилтэлэригэр баахтанан үлэлии барар буоллулар. Инаглинскайдааҕы сир баайын хостуур тэрилтэҕэ «Навахту14» бырайыак чэрчитинэн ананнылар.Манна барыллаан 35 сааһыгар диэри саастаах ыччат барда.
Бүгүн үлэһиттэри айанныахтарын иннинэ Нерюнгригэ өрөспүүбүлүкэ премьера Андрей Тарасенко уонна вице-премьерэ Ольга Балабкина көрүстүлэр. СӨ Ил Дархана Айсен Николаев Ил Түмэн сүбэ мунньаҕар эрэгийиэн бырабыыталыстыбата олохтоох дьону араас салааҕа үлэҕэ ылар туһунан саҥа механизмы толкуйдуурга сорудахтаабыт. Өрөспүүбүлүкэ «Олохтоох каадыры — бырамыысыланнаска» диэн бырайыагын кытта «Навахту14» бырайыак сэргэстэһэ үлэлээн үтүө түмүктэри ситиһэр кыахтанар. Бу бырайыагы 2020 сыллаахха сэтинньи ыйга саҕалаабыттара. Бырайыак үлэтэ суох дьоҥҥо үрдүк хамнаска бырамысыланнас эйгэтигэр үлэлииргэ көмөлөһөр.
«СӨ Ил Дархана Айсен Николаев дьаһалынан өрөспүүбүлүкэҕэ бырамыысыланнай кластеры сайыннарабыт. Сир баайын хостуур эрэ буолбакка, оҥорон таһаарар бырамыысыланнаһы эмиэ ааттыахха сөп. Бары оҥорон таһаарар тэрилтэлэргэ олохтоох ыччаты үлэҕэ ыларга, бу боппуруоһу быһаарарга «Навахту14» бырайыак сүрүн оруоллаах. Бу бырайыак чэрчитинэн ааспыт сайын сүүрбэлии киһилээх бөлөх үлэҕэ барбыт эбит буоллаҕына, бүгүҥҥү күҥҥэ номнуо сыыппара сүүскэ тэҥнэстэ», — диэнАндрей Тарасенко бэлиэтээтэ.
Инникитин бырайыагы кэҥэтэн атын хампаанньалары кытта ыкса алтыһан, үлэ миэстэтин эрэ биэрэр тэрилтэлэри кытта алтыспакка, бу боппуруос эргимтэтин тула, дьону үөрэтииттэн, олорор сирин, быраастарга көрдөрүнүүтүттэн саҕалаан ылыстахха дьону үлэҕэ олохтооһун кыаллар дьыала.
Ульяна ЗАХАРОВА.