Ааспыт нэдиэлэҕэ «Саха сирин бырамыысыланнаһын эдэр үлэһитэ» диэн бу эйгэҕэ ТОП-10 бастыҥ үлэлээх дьону сүүмэрдиир өрөспүүбүлүкэтээҕи форум буолан ааста. СӨ бырамыысыланнаһын миниистирэ Максим Терещенко иһитиннэрэринэн, маннык тэрээһин иккис төгүлүн ыытыллар.
edersaas.ru
Өрөспүүбүлүкэ бырамыысыланнай хампаанньаларыттан 35 диэри саастаах 70 эдэр дьон икки күн күрэс былдьастылар. Кыттааччылар бэйэлэрин билиһиннэрдилэр, үс бөлөхтөн турар тургутук-тест толордулар, дьыалабыай оонньууга, стратегическай сессияҕа кытыннылар.
Форум түмүгүнэн «Саха сирин бырамыысыланнаһын бастыҥ үлэһитэ» үрдүк аат иҥэрилиннэ: «ЯТЭК» ПГР учаастагын начаалынньыгын солбуйааччытыгар Тимофей Адаровка, «АЛРОСА» оҥорон таһаарар-тиэхиньиическэй салаатын начаалынньыгар Алексей Неустроевка, «ЯТЭК» сүрүн исписэлииһигэр Александр Гоголевка, «Газпром трансгаз Томск» Нерюнгритааҕы салаатын үлэһитигэр Андрей Дудоровка, «АЛРОСА» үлэни тэрийэргэ 1 категориялаах инженерыгар Ольга Теплюковаҕа, «Газпром трансгаз Томск» Алданнааҕы салаатын үлэһитигэр Иван Даниловка.
«Мин саныахпар, ким баҕарар ТОП-10 киириэн баҕарар буолуохтаах. Холобур, «Сахатранснефтегаз» хампаанньа 80 үрдүк баалы ылбыт уонна уон бастыҥнар кэккэлэригэр киирбит үлэһиттэрин акылаатын үрдэтиэх буолла. Устудьуоннар быраактыкалара төлөнүө. «Сургутнефтегаз» тэрилтэҕэ быраактыкалана киирэр кыаллыбат курдук этэ даҕаны, билигин устудьуоннары ыларга бэлэмнэрин эттилэр. Биһиги министиэристибэбит эмиэ ити үтүө бачыымҥа кыттыһан, бастыҥнар ахсааннарыгар киирбит икки эдэр дьону кылаабынай исписэлиис дуоһунаһыгар үлэҕэ ылыаҕа. Ол эрэн, бу форум туһата – саҥа билии-көрүү, үлэҕэ үөрүйэх, сатабыллаах, кыайыгас-хотугас буолууга үөрэтии», — диэн санаатын үллэһиннэ миниистир.
Марианна Тыртыкова, «Саха сирэ», edersaas.ru