«Олохтоох каадыры — бырамыысаланнаска» бырайыак чэрчитинэн Саха сирин 1780 олохтооҕо чох хостуур тэрилтэлэргэ үлэ булла.
Бу аҥардас чох хостооһунун быйылгы 9 ыйдааҕы көрдөрүүтэ. Сабаҕалааһын быһыытынан 2024 сылга бу салааҕа көрдөрүү 21 тыһыынча киһиэхэ тиийиэҕэ.
СӨ Аҕа баһылыгын уонна Бырабыыталыстыбатын пресс-сулууспата бэлиэтииринэн, кэлиҥҥи үс сылга «Денисовскай», «Инаглинскай-2», «ВаниноТрансУголь» курдук обогатительнай фабрикалар, «Инаглинскай» уонна «Восточнай Денисовскай» чох хостуур шахталар үлэҕэ киирдилэр.
— Уһук Илин, дойду экэниэмикэтэ сайдыытыгар, нолуок киириитин үрдээһинигэр, дьон олоҕо тупсуутугар Саха сирэ улахан оруоллаах. Маныаха сүрүн болҕомтобутун каадырдары — кыахтаах исписэлиистэри бэлэмнээһиҥҥэ уурабыт, — диэн эттэ СӨ Ил Дархана Айсен Николаев.
Үөрэх уонна наука, бырамыысыланнас уонна геология министиэристибэлэрэ, Якутуголь уонна Колмар, Саха сирин соҕуруу эҥэригэр баар технологическай кэллиэс уонна Эргиэн балаататын өйөбүллэринэн чох салаатыгар үлэлиир исписэлиистэри бэлэмниир кластер ситиһиилээхтик үлэлиир.
— Болҕомто хампаанньалар үлэлиир, дохуот киллэрэр сирдэригэр олорор олохтоох дьону үөрэтиигэ ууруллар. Өрөспүүбүлүкэ сүрүннээн бырамыысыланнас салаатыгар ирдэнэр идэлэргэ ыччаты үөрэтииигэ дьулуһар, —— диэн СӨ Бырамыысыланнаска уонна геологияҕа миниистирэ Максим Терещенко бэлиэтиир.
Елена ПОТОЦКАЯ, “Саха сирэ” хаһыат, edersaas.ru