Бэҕэһээ, олунньу 22 күнүгэр, Үөһээ Бүлүү улууһун Быракаан нэһилиэгэр көмүс буукубанан суруллар үтүө күн тосхойдо. Ол курдук, «Альтернатива» ХЭУо киин хочуолунайы үлэҕэ киллэрдэ.
Олохтоохтор кыһыл лиэнтэ быһыллыбытыгар, бары сүргэлэрэ көтөҕүллэн үөрэн-көтөн уруйдаатылар-айхаллаатылар. Алгысчыт Трофим Миронов аал уоту айах тутан, арчылаабытын кэнниттэн хочуолунай бэлиэ күлүүһүн «Альтернатива» ХЭУо генеральнай дириэктэрэ Иннокентий Николаев маастар Иван Анисимовка ытыс тыаһыгар доҕуһуоллатан туттарда. Үөрүүлээх түгэн бу эрэ буолбатах. Аны бу күн сир аннынааҕы ыраас ууну таһаарар анал скважинаны аһыы буолла.
Бу туһунан нэһилиэк баһылыга Алексей Оконосов: “2016-2017 сылларга нэһилиэктэр аайы сир анныттан скважина көмөтүнэн ууну таһаарарга аналлаах бырайыак үлэлээбитэ. Ону сөргүтэн, былырыын 140 миэтэрэ дириҥнээх сиртэн ууну таһаардыбыт. Скважина, анал дьиэтэ-уота барыта былырыын үмүрүтүллүбүтэ. Саҥа кыбартаалынай хочуолунайга скважина уутун тиэртибит. Билигин хочуолунайга 20-чэ ыал дьиэтэ холбонон, ити скважина уута туспа ситиминэн эмиэ тиийэн турар. Уу анаалыһыгар тимирэ элбэх диэн этэ. Үчүгэй фильтрдэри туруорбуппут. Билигин анаалыс түмүгэ үчүгэй, санэпиднадзор этэҥҥэ диэн быһаардаҕына, дьон тиэхиньиичэскэй эрэ сыалга буолбакка, аска-үөлгэ туһаныаҕа.
Быйыл олохтоохтор дьиэлэрэ барыта хочуолунайга холбонуллуоҕа, ону тэҥэ, ыраас уу тиэрдиллиэҕэ. Үгүс ыал урукку ититэр систиэмэлэрин аныгынан солбуйуохтара. Оччоҕуна сотору Быракаан ыаллара куораттыы толору хааччыллыылаах усулуобуйаҕа олоруохтара. Нэһилиэк сайдар-тупсар. Билигин спортивнай саала тутулла турар», — диэн кэпсээтэ.
Санатар буоллахха, Быракаан улуус кииниттэн 90 км ыраах сытар.
Александр Тарасов.