Бу күннэргэ Үөһээ Бүлүү улууһун Быракаан нэһилиэгэр сир анныттан ыраас ууну скважина көмөтүнэн таһаардылар. Онон бэрт сотору нэһилиэнньэ ыраас ууну иһиэҕэ.
Бу туһунан нэһилиэк баһылыга Алексей Оконосов: “2016-2017 сылларга нэһилиэктэр аайы сир анныттан скважина көмөтүнэн ууну таһаарарга аналлаах бырайыак үлэлээбитэ. Ону сөргүтэн, бу күннэргэ 140 миэтэрэ дириҥнээх сиртэн ууну таһаардыбыт. Скважина, анал дьиэтэ-уота барыта тутуллан бүттэ.
Сотору Быракааҥҥа саҥа кыбартаалынай хочуолунай үлэҕэ киирдэҕинэ, скважина уутун онно тиэрдиэхпит. Уу анаалыһыгар тимир баара биллэр. Онон бастаан утаа тиэхиньиичэскэй сыалга туһаныахпыт. Салгыы үчүгэй фильтрдэри туруордахпытына, иһэргэ төһө баҕарар барсыаҕа. Билигин ыраас ууну ыалларга тиэрдэр ситими тардыыны саҕалаатыбыт. Бастаан утаа ититэр ситим холбонуллубут 50-ча ыалга ыраас ууга аналлаах ситими эбии тардыахпыт. Онон барыта этэҥҥэ бардаҕына, нэһилиэнньэ ыраас ууну иһиэҕэ ”, — диэн иһитиннэрдэ.
Санатар буоллахха, Быракаан улуус кииниттэн 90 км ыраах сытар.
edersaas.ru