Интэриэһинэй Култуура

Бырайыак бастыҥ буолла



Норуоттар икки ардыларынааҕы архитектура уонна дизайн  XXVI быыстапкатыгар урукку кэмҥэ тутуллубут култуура дьиэлэрин чинчийии-бырайыагын бастыҥынан билиннилэр. Бэстибээл Москваҕа бэс ыйын 3-6 күннэригэр ыытылынна.
«Идентичность в Типовом. Реконструкция советских Домов Культуры» бырайыак куратордара Алексей Боев, Дарья Наугольнова, Visota бюро (Нидерланды). Воронежка уонна Елецкэ, экспозиция иитинэн, Дьокуускайга А.Е.Кулаковскай аатынан норуоттар доҕордоһууларын дьиэтин саҥалыы уларытан оҥоруу бырайыага көрдөрүүгэ туруорулунна. Үлэ сыала («Идентичность в Типовом») маассабай култуураҕа дьайар уонна уопсастыба интеллектуальнай таһымын үрдэтэргэ көмөлөһөр социальнай көстүү быһыытынан култуура дьиэтин эргиччи чинчийии. Ону тэҥэ, чинчийии архитектурнай-градостроительный көстүү кыһалҕатын эмиэ таарыйар.  Visota бюро хамаандата үлэтин сэбиэскэй кэмнээҕи култуура дьиэлэрин суолталаах оҥорор ньыманы көрдүүргэ туһулуур.
Алексей Боев Арассыыйаҕа урукку кэмҥэ тутуллубут култуура дьиэлэрэ, дыбарыастара уларыйан, ураты көрүҥнэнэн силигилииллэригэр үлэлэһэллэрин этэр.
Санатан эттэххэ, 2020 сыллаахха Дьокуускайга Visota бюрону төрүттээччилэр Дарья Наугольнова уонна Алексе Боев салалталарынан  «Култуура дьиэлэрин саҥа олоҕо» диэн архитектурнай хакатон ыытыллыбыта. Манна архитектордары, веб-дизайнердары сэргэ, Саха сиригэр култуура систиэмэтигэр үлэлиир эспиэрдэр — култуура министиэристибэтин , наука бэрэстэбиитэллэрэ, култуура дьиэлэрин салайааччылара, исписэлиистэрэ, кыраайы үөрэтээччилэр, культурологтар, уопсастыбаннас кыттыыны ылбыттара.
Бырайыак сүрүн соругунан тутууга Саха сирин устуоруйатын, култууратын сүрүн чааһынан буолар оччотооҕу архитектурнай көрүҥүн, уратытын харыстааһын. Бу туһунан СӨ Ил Дархан иһинэн архитектура уонна куораты тутуу управлениетын пресс-сулууспата иһитиннэрэр.
0
0