Маны аах Үөрэх уонна наука

Бырагыраама үлэтинэн тахсыбыт кинигэлэр кэмпилиэктэрин сүрэхтээһин

Бырагыраама үлэтинэн тахсыбыт кинигэлэр кэмпилиэктэрин сүрэхтээһин

Бүгүн “2020-2024 сылларга Саха Өрөспүүбүлүкэтин судаарыстыбаннай уонна дьиҥ таһымнаах тылларын харыстааһын уонна сайыннарыы” диэн Саха Өрөспүүбүлүкэтин Судаарыстыбаннай бырагыраамата дьиҥнээхтик олоххо киирбитин туоһулуур тэрээһин буолла. Ол курдук, бу бырагыраама чэрчитинэн саҥа үөрэтэр-методическай, уус-уран таһаарыылар бастакы комплектарын туттарыы сиэрэ-туома ыытылынна. Тэрээһиҥҥэ СӨ Бырабыыталыстыбатын Бэрэссэдээтэлин солбуйааччы Сергей Местников кытынна. Сергей Васильевич көрсүһүү арыллыытыгар  уу сахалыы тылынан санаатын үллэһиннэ.

— Бу бырагыраама инники сылга үбэ суоҕа. Ону өрөспүүбүлүкэ Ил Дарханын сорудаҕынан, СӨ Бырабыыталыстыбата 2021 сылга үп көрөн, судаарыстыбаннай бырагыраама үлэтин саҕалаабыта. Биллэрин курдук, Саха сиригэр 641 оскуола баарыттан, судаарыстыба суолталаах – 16, муниципальнай – 619, чааһынай – 6 оскуола бааллар. Бу оскуолалартан 61 бырыһыана, ол эбэтэр 393 оскуола саха тылынан үөрэтэр. Аҕыйах ахсааннаах норуоттар тылларынан учуобунньуктар саҥардыллыбатахтара өр буолла. Быйылгы 2021 сылга 54 мөл солк. судаарыстыбаннай бырагыраамаҕа көрүллүбүтэ, ол иһигэр 42 мөл – учуобунньуктарга бэрилиннэ. Тылбыт уонна култуурабыт норуоппут уратыта буолар. Ханнык баҕарар киһи ийэтэ биэрбит ийэ тылын илдьэ сылдьар эбээһинэһэ дии саныыбын. Онно уһуйаантан саҕалаан үөрэх кыһата улахан оруоллаах буолуохтаах. Төрөөбүт тыл үөрэҕэр учуобунньук тиийбэт кыһалҕатын быһаардыбыт. Ол эрээри тыл сайдыытыгар үөрэх эрэ эбээһинэһэ буолбатах, төрөппүттэртэн эмиэ улахан тутулуктаах, — диэтэ С.В.Местников.

Салгыы ханнык комплектар тахсыбыттарын билиһиннэрдилэр. Ол курдук, “Саха оскуолата” үөрэх систиэмэтин саҥа таһаарыылара”, “Саха уһуйаанын бибилэтиэкэтэ”, “Дьүкээбил суһумун аннынан” уо.д.а.

Онтон тылы  “С.А.Новгородов аатынан “Айар” кинигэ кыһатын генеральнай дириэктэрэ Август Егоров ылла. Кини бүгүҥҥү элбэх үөрэх кинигэлэрин сүрэхтиир тэрээһин ураты уонна суолталаах буоларын бэлиэтээтэ.

— Сергей Васильевич эппитин курдук, тылга анал бырагыраама быйылгыттан үбүлэнэн, үп-харчы көрүллэн, ураты сүрэхтэниини ыытар кыахтанныбыт. Уопсайа бу кинигэлэр 8 тылынан таҕыстылар. Түгэнинэн туһанан өрөспүүбүлүкэ Бырабыыталыстыбатыгар махтаныахпын баҕарабын, чуолаан, Бырабыыталыстыба Бэрэссэдээтэлин солбуйааччы С.В.Местниковка. Өрөспүүбүлүкэбитигэр олохтоох омуктар тылларыгар атын эрэгийиэннэрдээҕэр болҕомто ууруллар. 100 тахса кинигэни оҥоробут диэн эттэххэ дөбөҥ. Бу кинигэлэр тахсыыларыгар ааптардар, худуоһунньуктар, учуонайдар, учууталлар, методистар, кинигэ кыһатын үлэһиттэрэ улахан кыһамньыларын уураллар. Онон кинилэргэ махтанабын, — диир Август Васильевич.

Түмүккэ кинигэлэри таһаарыыга сыраларын иһин Бырабыыталыстыба Махтал суругунан бэлиэтээтилэр. А.Егоров, Е.Поликарпова, Н.Ситникова уо.д.а. наҕараадаланнылар.

ХИФУ бэһис кууруһун устудьуона Олег Сергучев  Күннүк Уурастыырап “Герой Попов туһунан ырыа хоһоонун аахта, Дьокуускай к. 26 №-дээх орто оскуолатын үөрэнээччилэрэ ыллаатылар.  Уонна саҥа тахсыбыт кинигэ кэмпилиэктэрин Амма орто оскуолатыгар, Дьокуускай к. 26 №-дээх оскуолатыгар, Горнай улууһун Бэс Күөлүн дьыссаатыгар уо.д.а. үөрүүлээх быһыыга-майгыга туттардылар.

Онон дириҥ суолталаах тэрээһин буолла.

Бэлэмнээтэ Женни Стрюкова

Хаартыскаҕа: тэрээһин түгэниттэн.

0
0
Telegram @edersaas20