Маны аах Уопсастыба

Элбэх оҕолоох дьиэ кэргэттэргэ ипотеканы сабалларыгар 450 тыһыынча солкуобай биэрэр бырагыраама усулуобуйата кэҥээтэ.

Бу төлөбүр 2019 сыл тохсунньу 1 күнүттэн үһүс, төрдүс уонна онтон кэлэр оҕолоро төрөөбүт дьиэ кэргэттэргэ ипотекаларын сабалларыгар бэриллэр. Урут бу төлөбүрү кыбартыыраны, эбэтэр дьиэни атыылаһарга ылыллыбыт ипотекаҕа эрэ ыытыахха сөп этэ.

Билигин саҥа сокуон чэрчитинэн, тус хаһаайыстыба тэринэргэ анаммыт сир учаастагын, тутуллан бүтэ илик олорор дьиэни атыылаһарга, саҥа дьиэни туттуу кирэдьиитин сабарга, дьиэни тутар кэпэрэтиипкэ усунуоһу төлүүргэ уонна өрөмүөн оҥорорго бу төлөбүрү ыытыахха сөп буолла. Ону тэҥэ, уопсай бас билиигэ атыылаһыллыбыт дьиэ өлүүтүн төлүүргэ ыытыахха сөп, ол эрээри, бу дьиэ элбэх оҕолоох төрөппүттэр бас билиилэригэр киирэр буоллаҕына.

Онон бырагыраама кэҥээн, элбэх ыаллар туһанар кыахтаннылар. Бу төлөбүрү ипотекаҕа эрэ туһаныллар, бастакы усунуоһу төлүүргэ ыытар көҥүллэммэт. 450 тыһыынча солкуобай суумалаах төлөбүрү уу харчынан биэрбэттэр, билигин төлөнө сылдьар ипотекаҕа эрэ ыытыллар. Ипотеканы урут, оҕо төрүөн иннинэ да ылбыт буолуохха сөп. Бырагыраама 2023 сыл от ыйын 1 күнүгэр диэри үлэлиир.

Ангелина Васильева, «Саха сирэ» хаһыат, edersaas.ru

Хаартыска: rg.ru

1
0