Бырабыыталыстыба тутааччыларга административнай ноҕуруусканы аччатыаҕа
2022 сыл атырдьах ыйын 1 күнүгэр диэри бүтэр тутуу көҥүлүн туһаныллар болдьоҕо аны биир сыл уһаан биэриэҕэ. Бу уураахха бырабыыталыстыба Бэрэссэдээтэлэ Михаил Мишустин илии баттаата.
Маннык миэрэ көмөтүнэн тутааччылар административнай процедуралары ааһалларыгар эбии күнү-дьылы сүтэриэхтэрэ суоҕа уонна тутар бырайыактарын олоххо киллэрэргэ турунуохтара.
Ону тэҥэ биир сылга куораты тутууга сир учаастактарын былааннарын туһаныллар болдьоҕо уһаата. Бу докумуонунан ханнык баҕарар дьиэни-уоту бырайыактыыллар уонна туталлар.
Өссө биир докумуон – сири-уоту былааннааһын бырайыагын бэлэмниир туһунан былаас уорганын уурааҕын толоруу ирдэммэт уонна маннык бырайыагы сөбүлэһиннэрэр болдьох 15-тэн 10 күҥҥэ диэри аччыыр.
Уларыйыылар тутууга көҥүлү биэрии процедуратыгар уонна тутуллубут эбийиэктэри үлэҕэ киллэриигэ көҥүлгэ эмиэ сыһыаннаахтар. Онон тутааччы тутууну кэтээн көрөр уорганнарга ГПЗУ уонна атын да докумуоннары биэрэрэ ирдэммэт.
Бу уураах тутааччыларга саҕалаабыт тутууларын түмүктүүллэригэр уонна экэниэмикэ уустук балаһыанньатыгар тутууга саҥа бырайыактары көҕүлүүллэригэр көмөлөһүөҕэ.
Тутуу салаатын өйүүр олус суолталааҕын туһунан Михаил Мишустин хаста да эппитэ. “Билиҥҥи үөскээбит усулуобуйаҕа биһиги сорукпут – тутуу тохтуо суохтаах. Бу дьиэҕэ уонна кыбартыыраҕа наадыйары мөлүйүөнүнэн киһиэхэ дьоһун суолталаах”, — диэбитэ кини кулун тутар 9 күнүгэр ыыппыт Бырабыыталыстыба мунньаҕар.
РФ Бырабыыталыстыбатын саайтыттан
Бэлэмнээтэ Женни Стрюкова
Хаартыска: тустаах саайтан