Бырабыыталыстыба сыана үрдээбэтин кэтээн көрөр

Бөлөххө киир:

Премьер-миниистир Михаил Мишустин бырабыыталыстыба бородуукта уонна араас өҥө сыаналарын болҕомтолоохтук кэтээн көрөр диэн эттэ.

— Тыа хаһаайыстыбатын министиэристибэтигэр уонна тустаах биэдэмистибэлэргэ Уһук Илин уокуругуттан сибиэһэй балыгы уонна балык бородууксуйатын атын эрэгийиэннэргэ тиэрдии боппуруоһун быһааралларыгар сорудах биэрдим. Манна бириистэнтэн маҕаһыыҥҥа тиийэр суолун кэтээн көрөн, сыана үрдээбэтин ситиһиэхтээхпит, — диэн кини эттэ.

Михаил Мишустин билигин Уһук Илин эрэгийиэнигэр командировкаҕа сылдьар. Кинини вице-премьердэр Юрий Борисов уонна Юрий Трутнев арыаллыыллар.

Бородууктаҕа сыана үрдүүрүн туһунан боппуруоһу от ыйын 21 күнүгэр бэрэсидьиэн Владимир Путин ыыппыт мунньаҕар ырытыспыттара. Онно Путин былаас уорганнара бородуукта сыанатын хонтуруолга ылыахтаахтарын уонна тыа хаһаайыстыбатын оҥорон таһаарааччылар бородууксуйаларын батаралларыгар усулуобуйа оҥороллоругар сорудахтаабыта.

Саха сиригэр бородууктаҕа сыана үрдээбэтин, хотугу таһаҕас тиэйиитин боппуруостарыгар бырабыыталыстыба “Росрезерв” федеральнай ааҕыныстыбаны кытары бииргэ үлэлэһэр. Бу туһунан СӨ бырабыыталыстыбатын бэрэссэдээтэлэ Андрей Тарасенко иһитиннэрдэ.

Федеральнай ааҕыныстыбаны кытары Арктика улуустарын бородууктанан хааччыйыы боппуруоһугар бииргэ үлэлэһиини кэҥэтэр. “Росрезерв” сэртипикээттэммит, хаачыстыбалаах, намыһах сыаналаах табаардары аҕаларга бэлэмин биллэрдэ.

Ангелина Васильева, “Саха сирэ” хаһыат, edersaas.ru

Хаартыска: sakhagov.ru

+1
0
+1
0
+1
0
+1
0
+1
0
+1
0
+1
0