Бырабыыталыстыба потребительскай ырыынак сыанатын хонтуруоллааһыны күүһүртэ
Михаил Мишустин сыана аһары үрдээһинин утары дьаһал таһаарбыта. Манна ааҕыҥ.
Арассыыйаҕа потребительскай табаардарга уонна өҥөҕө сыананы куруук кэтииллэр. Маннык быһаарыыны Бырабыыталыстыба бигэргэппитэ.
Сыананы кэтээн көрүүнэн уонна төһө тэтимнээхтик улааппытынан экэниэмикэ сайдыытын министиэристибэтэ Россстаты уонна Монополияны утары федеральнай сулууспаны кытта дьарыктаныахтара. Сыана тэтимнээхтик үрдүүрүн биллэхтэринэ иһитиннэриини тута туһааннаах министиэристибэлэргэ уонна биэдэмистибэлэргэ, салгыы Бырабыыталыстыбаҕа ылынар миэрэлэригэр анаан ыытыахтара.
Михаил Мишустин илии баттаабыт дьаһалынан министиэристибэлэргэ уонна биэдэмистибэлэргэ табаар уонна өҥө көрүҥнэригэр эппиэтинэһи сүктэрдилэр. Ол курдук, Тыа хаһаайыстыбатын министиэристибэтэ ас-үөл бородууктатын уонна табаҕы (12 позиция) көрүөҕэ.
Бырамыысыланнай эргиэн министиэристибэтэ – потребительскай табаардары, онно дьиэҕэ-уокка туттуллар тиэхиньикэ, миэбэл, компьютердар уонна төлөпүөннэр киириэхтэрэ. Доруобуйа харыстабылын министиэристибэтигэр – мэдиссиинэ тэриллэрэ уонна эмп-том, мэдиссиинэ уонна санаторнай-чэбдигирдэр өҥөлөр.
Энергетика министиэристибэтэ бэнсиин уонна дизель иһин эппиэтинэһи сүгүө, Сыыппара министиэристибэтэ – сибээс өҥөтүн. Тутуу министиэристибэтэ – дьиэ-уот хомунаалынай өҥөтүн. Тырааныспар министиэристибэтэ дьону салгынынан, тимир суолунан, массыынанан (такситтан ураты) тиэйиини, ону тэҥэ куораттааҕы электротырааныспарынан сырыыны көрүөҕэ. Үөрэх министиэристибэтэ – оскуола иннинээҕи иитиини, ону тэҥэ идэтийбит уопсай уонна орто үөрэхтээһин өҥөлөрүн, наука министиэристибэтэ – үрдүк үөрэх өҥөлөрүн сыанатын куруук кэтиэхтэрэ.
Роструризм ис ырыынакка гостиницаҕа олоруу сыанатын хонтуруоллуоҕа.
Росалкогольрегулирование итирдэр утахтар сыаналарын иһин эппиэтинэһи сүгүөҕэ.
РФ Бырабыыталыстыбатын саайтыттан
Бэлэмнээтэ Женни Стрюкова
Хаартыска: тустаах саайтан.