Бырабыыталыстыба отчуота: хоту улуустары аһынан-үөлүнэн хааччыйыы
СӨ бырабыыталыстыбатын отчуота ыытыллыбыта номнуо сүүрбэччэ сыл буолла. Онтон премьер-миниистир Андрей Тарасенко салайыытынан бырабыыталыстыба отчуота иккис сылын ыытыллар.
Быйылгы отчуот хааччахтааһынынан сибээстээн эмиэ онлайн киэбинэн олунньу саҥатыттан саҕаламмыта. Уопсайа быһа эпиирдэр кэмнэригэр 2,5 тыһыынча кэриҥэ ыйытыы киирбититтэн, 700-кэ ыйытыыга тута хоруй бэриллибитэ диэн премьер-миниистир Андрей Тарасенко бэлиэтээн эттэ.
Бүгүҥҥү түмүктүүр отчуот кэмигэр бырабыыталыстыба бэрэссэдээтэлин солбуйааччылара бары бэйэлэрин салааларын кылгас түмүктэри уонна быйылгы соруктар тустарынан иһитиннэрдилэр. Ыйытыыларга киирии кэннэ, суруналыыс Дмитрий Аргунов премьер-миниистиртэн хоту улуустарын аһынан-үөлүнэн хааччыйыы саҥа ньыматын туһунан ыйытта. Санатан эттэххэ, былырыын Арктика оройуоннарын олохтоохторугар ас-үөл өттүнэн куттал суох буолуутун бөҕөргөтөргө Абый улууһун Белай Горатыгар уонна Усуйаана оройуонун Уус Куйгатыгар эргиэн-логистика кииннэрэ аһыллыбыттара. 2025 сылга диэри эргиэн-логистика кииннэрэ Арктика 13 оройуонугар барытыгар баар буолуохтара, бу сыалга федеральнай киинтэн 1 миллиартан тахса солкуобай суумалаах үп көрүллүөхтээх.
— Тиэйии-таһыы үлэтин салгыы өссө тупсарыахпыт. Ас-үөл көрүҥүн элбэтиэхпит. Сибиэһэй оҕуруот аһын хоту улуустарыгар барыларыгар тириэрдиэхпит. Онон Ил Дархан туруорбут сорудаҕын толоро олоробут, — диэн Андрей Владимирович иһитиннэрдэ.
Маны таһынан санкциянан сибээстээн, аһынан-үөлүнэн хааччыйыыга кыһалҕа үөскүө суоҕун, билиҥҥитэ ас-үөл улахан саппааһа баарын туһан премьер-миниистир бэлиэтээн эттэ.
ЫСПЫРААПКА:
Эргиэн-логистика 4 киинэ быйыл тутуллара былааннанар (Аллараа Халыма оройуонун Черскэй б., Верхоянскай оройуонун Баатаҕай б., Орто Халыма оройуонун Орто Халыма к., Эдьигээн улууһун Эдьигээн с.).
edersaas.ru
Хаартыска СИА