СӨ Ил Дархана Айсен Николаев «Саха» НКИХ уонна «Якутия 24» ханаалларга биир ыйдаах үлэ түмүгүн сырдатта.
Бастатан, сыл ахсын үгэс курдук улуустарга, нэһилиэктэргэ ыытыллар СӨ Бырабыыталыстыбатын отчуота быйыл, коронавируһунан санитарнай-эпидемиологическай миэрэлэри тутуһуунан сибээстээн, хайдах быһыылаахтык ыытыллыаҕын туһунан кэрэспэдьиэн ыйытта. Маныаха Айсен Сергеевич маннык хоруйдаата:
— СӨ Бырабыыталыстыбатыгар отчуоту быйыл хайдах тэрийэн ыытар туһунан кэпсэтии, дьүүллэһии ыытыллыбыта. Биллэн турар, урукку курдук олохсуйбут үгэһинэн улуустарга, нэһилиэктэргэ тиийэн дьону-сэргэни кытары атах тэпсэн олорон сэһэргэһиэҕи баҕарыллар. Итинник тутуһан олорон ирэ-хоро сэһэргэһэри дьон-сэргэ да сөбүлүүр. Ол гынан баран, өрөспүүбүлүкэҕэ биллэриллибит санитарнай ирдэбиллэри бука бары тутуһуохтаахпыт өйдөнөр. Онон быйыл онлайн-эрэсииминэн ыытарга быһаарынныбыт. Нэһилиэнньэ үксэ интэриниэккэ киирэр кыахтааҕынан, буолан баран быһа холуйан 86% түргэн интэриниэттээҕинэн, ити ньыманан туһаныахтаахпыт.
Олунньу 6 күнүттэн олунньу 27 күнүгэр диэри «Саха» НКИХ, «Якутия24» ханаалларынан СӨ Бырабыыталыстыбатын отчуота ыытыллыаҕа. Быһа биэрии кэмигэр дьон-сэргэ төлөпүөнүнэн, батсаабынан, one-click ыйытыылары биэриэхтэрин сөп. Маннык ньыманан үлэлээһин элбэх ыйытыы киирэригэр көмөлөөх буолуо. Маныаха министиэристибэлэргэ эмиэ бэйэлэрин үлэлиир бөлөхтөрүнэн, оройуоннарынан куйаар ситиминэн быһа сибээһи олохтуулларыгар сорудах бэриллибитэ.
Быйыл отчуот пандемияттан харгыстаммакка хайаан да ыытыллар, боротокуоллар үгэс курдук хас биирдии улууһунан, нэһилиэгинэн толоруллуохтара. Бырабыыталыстыба ыытыллыбыт үлэ түмүгүнэн көрөн 2021 сылга сирдэтинэрин курдук, — диэтэ Ил Дархан.