Ситэриилээх былаас отчуота бүгүн Нам улууһун Кыһыл дэриэбинэ уонна Граф Биэрэгэ сэлиэнньэлэригэр ыытыллар. Олохтоохтор былаас отчуотугар көхтөөхтүк кыттан, араас интэриэһинэй ыйытыылары биэрэллэр.
Айталина Винокурова: «Кыһыл Дэриэбинэҕэ килиэп сыаната 42 солк. Мэҥэ-Хаҥалас улууһунааҕар (онно 30-тан тахса солк.) тоҕо ыараханый?» — диэн туоһуласта. Ону тэҥэ кини «Спутник- нэһилиэктэр» диэн ааттаах нэһилиэнньэлээх пууннар кулууптарын сабар туһунан сурах төһө олохтооҕун ыйытта. «Биһиги нэһилиэкпитигэр саҥа кулууп былырыын ахсынньыга киирбитэ. Нэһилиэкпит олохтооҕун ахсаана элбии турар, 300 киһи буолла. Онон сайдар саҕахха үктэммит нэһилиэк кулууба сабыллымыан наада«, — диэн эттэ. Ыйытыыларга СӨ Сыана бэлиитикэтин судаарыстыбаннай кэмитиэтин салайааччыта Антонина Борисова маннык хоруйу биэрдэ: «Дьокуускайга килиэп сыаната 67-69 солк. Намҥа — 50-53 солк. Ол эбэтэр Дьокуускайга килиэп сыаната 23%-нан үрдүк. Мин бу биир буулканы киилэтигэр таһааран холобурдуубун. Килиэби тыа сиригэр сүрүннээн аччыгый бизнес эйгэтин үлэһиттэрэ — предпринимателлэр оҥорон таһаараллар. Кинилэр бурдуктарын, ууларын, коммунальнай ороскуоттарын бэйэлэрэ уйунар буолан, сыаналарын бэйэлэрэ быһаллар«.
Андрей Евстафьев Мэҥэ-Хаҥалас Хаптаҕайын бурдук оҥорон таһаарар собуота төһө көдьүүстээхтик үлэлиирин, эт аһы переработкалыырга туох кэскиллээх былаан баарын ыйытта. Антонина Винокурова тэрилтэ бородууксуйаны оҥорон таһаарар кээмэйэ кыра буолан, көдьүүстээхтик үлэлээбэтин бэлиэтээтэ. Улуус баһылыга Юрий Слепцов былырыын оройуон сайдыытын Стратегията оҥоһуллубутун бэлиэтээтэ. — Бу суолталаах докумуону оҥорорго нэһилиэктэртэн кэккэ бырайыактары көрдөөбүппүт. Онно эт аһы оҥорон таһаарыыга хас да кэскиллээх бырайыак баара. Онон улууска бу салааҕа конкуренция үөскээн, эт аһы оҥорон таһаарыы кээмэйэ үрдүөҕэ, — диэн эттэ.
Лариса Багынанова: батсаапка сотору-сотору ыараханнык ыалдьар дьоҥҥо анаммыт Аһымал кэнсиэрдэр буолалларын туһунан иһитиннэрии кэлэрин, судаарыстыба тоҕо итинник ыарыһахтар эмтэниилэрин уйбатын туһунан ыйытта.
Маны таһынан, Кыһыл Дэриэбинэ олохтооҕо «Айыы кыһата» оскуола, тыа хаһаайыстыбатыгар сыһыаннаах, эм тэрилтэтин, интернет уо. д. а үгүс ыйытыыны биэрдэ. Кини ыйытыыларыгар барытыгар толору хоруйу ылла. Отчуот кэнниттэн олохтоохтору кытта биирдиилээн кэпсэтии буолан, дьон санааларын толору этинэн, санаалара көнньүөрэн тарҕастылар.
Елена Потоцкая бэлэмнээтэ, «Саха сирэ» хаһыат, edersaas.ru