Бырабыыталыстыба мэдиссиинэ үлэһиттэригэр төлөбүргэ 68 млрд тахса солкуобайы көрүөҕэ
Коронавирус дьаҥынан ыалдьыбыттарга көмөлөһөр мэдиссиинэ үлэһиттэригэр анаммыт социальнай төлөбүрдэргэ Бэрэсидьиэн сорудаҕын чэрчитинэн өссө 68,6 млрд солк. көрүллүөҕэ. Бу туһунан дьаһалга Бырабыыталыстыба Бэрэссэдээтэлэ Михаил Мишустин илии баттаата.
Төлөбүрдэр быраастарга, орто уонна алын медперсоналга, биэлсэрдэргэ, ону тэҥэ COVID-19 ыалдьыбыттары кытта хантаактаһар суһал көмө массыынатын суоппардарыгар бэриллиэҕэ. Бу сыалга үп Бырабыыталыстыба саппаас пуондатыттан киириэҕэ.
Дьаһалынан көрүллүбүт суума толуйуу кээмэйдэрин чахчытыгар олоҕурда. Маны мэдиссиинэ үлэһиттэригэр 2021 сыл бүтүөр диэри төлөбүргэ ананна.
“Доруобуйа харыстабылын министиэристибэтиттэн хас биирдии эрэгийиэҥҥэ бу үп кэмигэр уонна толору кээмэйинэн киирэрин кэтииллэригэр көрдөһөбүн”, — диэтэ Михаил Мишустин алтынньы 19 күнүгэр коронавирус саҥа дьаҥын тэнийиитин тохтотууга Бырабыыталыстыба иһинэн Сүрүннүүр сэбиэтин президиумун мунньаҕар.
Маны сэргэ ЫБМ, Оборона министиэристибэтин, Росгвардия уонна кэккэ биэдэмистибэлэр тэрилтэлэригэр үлэлиир эмчиттэргэ төлөбүргэ 482,9 мөл солкуобайы көрөр туһунан дьаһалга илии баттанна.
РФ Бырабыыталыстыбатын саайтыттан
Бэлэмнээтэ Женни Стрюкова
Хаартыска: тустаах саайтан