Ил Дархан эбээһинэһин кылгас кэмҥэ толорооччу Айсен Николаев бүгүн бырабыыталыстыба чилиэннэрин, Ил Дархан уонна бырабыыталыстыба дьаһалтатын кытары бастакы улахан мунньаҕын ыытта. Мунньахха бырабыыталыстыбаҕа уонна дьаһалтаҕа улахан уларыйыы күүтэрин эттэ.
Айсен Сергеевич эрдэ иһитиннэрбитин курдук, дьаһалтаҕа уонна бырабыыталыстыбаҕа улахан уларыйыылар күүтэллэр. Каадыры аттаран туруорууттан саҕалаан үлэ систиэмэтигэр тиийэ. “Ил Дархан уонна бырабыыталыстыба дьаһалтатыгар да, бырабыыталыстыбаҕа да каадыры аттаран туруоруу, структуратын уларытыы барыаҕа. Хас биирдии министиэристибэ, биэдэмистибэ үлэтэ өссө көдьүүстээх буоларын туһугар уларыйыы-тэлэрийии син-биир наада. Ити бастакы уочаракка турар сыалбыт-сорукпут”, — диэн иһитиннэрэр мунньахха Айсен Николаев.
Итини таһынан хас биирдии судаарыстыбаннай сулууспалаах үлэтэ көдьүүстээх буоларын көрүөхтэрэ. Чуолаан миниистирдэр, вице-премьердэр үлэлэрин түмүгүн учуоттааһын кытаанахтык хонтуруолланыаҕа. Судаарыстыбаннай сулууспаҕа үлэҕэ киирэр киһи туох баар бэрэбиэркэни барытын ааһыаҕа. Ол иһигэр быраабы көмүскүүр уорганнартан көҥүлү ылыаҕа.
Үлэ тэрээһинигэр сыһыаран Айсен Николаев докумуону ылсыыны-бэрсиини, тырааныспар боппуруоһун, туһааннаах сэбиэттэр үлэлэрин хат көрөргө эттэ. “Докумуону ыытыы, ылсыы-бэрсии улаханнык уларыйбатах. Ити үлэни харгыстыыр. Онон докумуоннары электроннайга көһөрүү күүскэ ыытыллыахтаах. Ону таһынан биһиэхэ үгүс координационнай сэбиэттэр диэн бааллар. Кинилэр үлэлэрэ төһө көдьүүстээҕий? Ону көрүөххэ. Үлэҕэ анаммыт тырааныспардары туһаныы эмиэ уларыйыахтаах”, — диэн бэлиэтиир.
Ону таһынан Айсен Сергеевич федеральнай таһымҥа дьокутааттары кытта үлэ күүскэ ыытыллыахтааҕын эттэ. “Федеральнай Мунньахха, Судаарыстыбаннай Дуумаҕа бэйэбититтэн дьокутааттардаахпыт. Кинилэри кытары ыкса үлэлэһиэҕиҥ, уопуттарын, кыахтарын толору туһаныаҕыҥ”, — диэн иһитиннэрдэ.
Аграфена КУЗЬМИНА, “Саха сирэ” хаһыат, edersaas.ru