Бырабыыталыстыба Өлөөн эбэҥки национальнай оройуонун нэһилиэнньэтин иннигэр отчуоттаата
Олунньу 8 күнүгэр СӨ Бырабыыталыстыбата Өлөөн эбэҥки национальнай оройуонун нэһилиэнньэтин иннигэр отчуоттаата. Онлайн-мунньаҕы Нэһилиэнньэ дьарыктаах буолуутугар Саха Өрөспүүбүлүкэтин судаарарыстыбыннай кэмитиэтин бэрэссэдээтэлэ Калашникова Елена Виссарионовна салайан ыытта.
Отчуокка оройуон нэһилиэктэрин бэрэстэбиитэллэрэ, Өлөөн салалтата, оройуон биллэр-көстөр дьоно кыттыыны ылла. Елена Виссарионовна 2021 сылга өрөспүүбүлүкэ сүрүн ситиһиилэрин сэргэ, күчүмэҕэйдэргэ тохтоон ааста. Ол курдук, ойуур баһаардарын утары үлэ, кураан содулун туоратыы хайдах барбытын туһунан сиһилии дакылааттаата. Үгэс курдук отчуот кэмигэр нэһилиэнньэттэн ыйытыылар киирдилэр.
Ветеран табаһыт Мария Христофоровна Иванова хас даҕаны ыйытыгы бырабыыталыстыба туһааннаах бэрэстэбиитэллэригэр биэрдэ. Холобура, булчуттар пенсияҕа тахсалларыгар туттарар түүлээхтэрин ахсаана хайдах учуоттанарын, кэнэҕэскигэ ол кээмэйэ улаатыан сөбүн-суоҕун ыйыталаста. Үлэ миниистирэ Елена Волкова маннык хоруйдаата: “Пенсия федеральнай сокуоҥа олоҕуран ааҕыллар, ону таһынан өрөспүүбүлүкэ иһинээҕи сокуонунан булчуттар, балыксыттар уонна да атын үлэһиттэр эбии пособия ылар бырааптаахтар. Бу боппуруоска улуус баһылыгын Лена Степановнаны кытта отчуот кэнниттэн салгыы кэпсэтиэхпит”.
Дьилиҥдэ ыстаадатыгар вездеход атыылаһыыта, Харыйалаах оскуолатыгар саҥа специалистар кэлиилэрин көҕүлүүр миэрэлэр, эдэр табаһыттарга көмө харчы, тутуу матырыйаалларын тиэйии, Солоҕоҥҥо диэри түргэн интэриниэт ситимин тардыы, олохтоох ыччаты сир баайын хостуур тэрилтэлэригэр үлэлэтии уонна да атын ыйытыыларга бырабыыталыстыба бэрэстэбиитэллэрэ хоруйдаатылар. Ыйытыы биэрбит Өлөөн олохтоохторо бырабыыталыстыба үлэтин үрдүк таһымнаахтык сыаналыылларын биллэрдилэр.
«Саха сирэ» хаһыат, edersaas.ru
Хаартыска Zoom