Бырабыыталыстыба кислород концентратордарын тиэрдиигэ үбү көрдө
Коронавирус инфекциятыттан ыалдьыбыттары эмтээһиҥҥэ кислород концентратордарын атыылаһыыга эрэгийиэннэргэ 651,9 мөл тахса үп ыытыллыаҕа. Маннык дьаһалга Бырабыыталыстыба Бэрэссэдээтэлэ Михаил Мишустин илии баттаата.
“Кислород саппааһын сөптөөх таһымҥа тутуохтаахпыт. Эрэгийиэн былаастара маны эрдэттэн былааннаан, оборудованиеларын туругун хонтуруоллуохтаахтар. Бу мантан дьон олоҕо тутулуктаах”, — диэтэ Михаил Мишустин вице-премьердэри кытта ыыппыт мунньаҕар атырдьах ыйын 23 күнүгэр.
Концентратордар балыыһаларга кислородунан тыыналларыгар эрэйдэнэр дьону хааччыйаллар. Үбү 20 эрэгийиэҥҥэ ыытыахтара. Кинилэр истэригэр – Алтай кыраайа, Иркутскай уобалаһа, Калмыкия, Коми уо.д.а.
Хас биирдии эрэгийиэн ортотунан 32,5 мөл солк. ылыаҕа. Бу үп оборудованиены атыылаһыыга, тиэрдиигэ уонна таҥыыга сөп буолуоҕа.
РФ Бырабыыталыстыбатын саайтыттан
Бэлэмнээтэ Женни Стрюкова
Хаартыска: саайтан