Маны аах Экэниэмикэ

Бырабыыталыстыба хамсык хааччахтааһыныгар дьоҕус уонна орто биисинэһи өйүүр туһунан уурааҕы бигэргэттэ

Судаарыстыба хамсык дьаҥын балаһыанньата мөлтөөн, хааччахтааһыҥҥа түбэспит дьоҕус уонна орто биисинэһи, ону тэҥэ социальнай хайысхалаах кэмиэрчэскэйэ суох тэрилтэлэри өйүөҕэ.

Быһаарыыны Бэрэсидьиэн ыйааҕар олоҕуран ылыннылар. Өрүүр күннэр эрэсиимнэрин кэмигэр ордук эмсэҕэлээбит биисинэс салааларын өйүүргэ биир үлэһиккэ (сотрудникка) биир МРОТ-унан (12792 солк) суоттаан биир кэмнээх төлөбүр туһунан этиллэр.

Граннар сайаапка бириинсибинэн бэриллиэхтэрэ. Сайаапкалары тэйиччиттэн Федеральнай нолуок сулууспата хомуйуоҕа. Урбаанньыттарга ФНС саайтыгар нолуогу төлөөччү тус кэбиниэтигэр сайабылыанньа биэриэххэ наада. Маныаха тэрилтэ дьоҕус уонна орто урбаан субъектарын биир кэлим реестригэр, биитэр Экэниэмикэ сайдыытын СОНКО реестригэр регистрацияламмыт буолуохтаах.

Сайабылыанньаны биэрии сэтинньи 1 күнүттэн саҕаланар, төлөбүрү сэтинньи 15 күнүттэн төлүөхтэрэ уонна 2021 сыл бүтүөр диэри барыаҕа.

Грант ылыахтарын сөптөөх салаалар испииһэктэригэр 21 позиция баар, онно физкультурай-чэбдигирдэр өҥөлөр, оҕолорго уонна улахан дьоҥҥо эбии үөрэхтээһин, зоопааркалар, киинэ тыйаатырдарын, сынньатар-аралдьытар тэрилтэлэр, мусуойдар, стоматология кэбиниэттэрэ, парикмахерскайдар уонна кэрэ буолуу солуоннара эмиэ киирэллэр.

Михаил Мишустин бэлиэтээбитинэн, өйөбүлү ылааччылар гранынан дохуоттарын нолуогуттан уонна үлэһиттэрин хамнастарынан бүддьүөтү таһынан судаарыстыбаннайа суох пуондаларга усунуостары төлөөһүннэриттэн биирдэ эрэ босхолонуохтара, оттон олор – маннык үптэн подоходнай нолуок төлөбүрүттэн.

Граннары төлөөһүн 3 мөлүйүөн кэриҥэ үлэһити өйүөҕэ. Үбүнэн көмө уопсай кээмэйэ 38,5 млрд солкуобай. Үбү биэрэр туһунан дьаһал чугастааҕы кэмҥэ илии баттаныаҕа.

РФ Бырабыыталыстыбатын саайтыттан

Бэлэмнээтэ Женни Стрюкова

Хаартыска: тустаах саайтан

1
0