Олунньу 8 күнүгэр СӨ Бырабыыталыстыбата Эдьигээн эбэҥки национальнай оройуонун нэһилиэнньэтин иннигэр отчуоттаата. Отчуот видео кэмпириэнсийэ нөҥүө ыытылынна. Бырабыыталыстыба отчуотун сүрүн спикерынан Үлэ уонна социальнай сайдыы миннистирэ Елена Волкова буолла.
Кини сүрүн отчуоту сэргэ короновирус хамсыга аҕалбыт кыһалҕаларын бохсуруйуу миэрэлэрин сиһилии билиһиннэрдэ. Ол курдук, хааччах кэмигэр нэһилиэнньэ араас араҥаларын социальнай өйөбүл быһыытынан ханнык төлөбүрдэр оҥоһуллубуттарын, урбаан эйгэтигэр туох үлэ барбытын кэпсээтэ. Отчуот түмүгэр Эдьигээн оройуонугар бу сылга туох уларыйыылар, тутуулар былааннамыттарын туһунан иһитиннэрдэ.
Ол кэнниттэн мустубут дьон ыйытыыларга киирдилэр. Олус элбэх ыйытыы тутуу эйэгэтигэр, чуолаан үөрэх эбийиэктэрин саҥардыы туһунан бэрилиннэ. Биир маҥнайгынан төрөппүттэр кэмитиэттэрин бэрэстэбиитэлэ 160 миэстэлээх “Елочка” уһуйааныгар саҥа детсад тутулларын туруоруста. Билигин уһуйаан 1960-70 сылларга тутуллубут эргэ дьиэлэргэ олохсуйбут. Дьиэлэр олус тымныылар, оҕо доруобуйатыгар охсуулаах буолуон сөп диэн сэрэттэ. Оскуола тутуутун оройуон кииниттэн уонна Баахынай нэһилиэктэн туруорустулар. Ону сэргэ Эдьигээҥҥэ Роман Дмитриев аатынан спорткомплекс тутуутун бырайыагын бигэргэтэн, “аатырбыт биир дойдулаахпыт 75 саастаах үбүлүөйүгэр киллэрэр гына тутууну саҕалыахха” диэн этии киирдэ. Мунньах кэмигэр бу тутуу үбүлээһинин федеральнай нацбырайыакка киллэрэн, өрөспүүбүлүкэ онно кыттыһыан сөп диэн биир санааҕа кэллилэр.
Эдьигээннэр түргэн интэриниэти туруорсаллар. Бу ыйытыыга Эдьигээнтэн төрүттээх Инновацияҕа миниистири бастакы солбуйааччы Петр Васильевич Николаев хоруйдаата. “Бу кыһалҕа көхтөөх ырытыыны ааһа сылдьар. Ил Түмэн дьокутааттара туруорсууларынан оройуоҥҥа оптоволокно ситимин тардыы боппуруоһа сыл ортотуттан көтөҕүллүбүтэ. Ростелекому кытта кэпсэтии түмүгүнэн бу хампаанньа бырайыак үбүлээһинин аҥарын уйунуох буолбута. Билигин бырабыыталыстыбаттан 180 млн кэриҥэ үп ирдэнэр. Билиҥҥи туругунан үбүлээһииҥэ аккаас кэлэн сытар. Ол эрэн, санаа түһэрэр сыыһа, кэлэр нэдиэлэҕэ оройуон бэрэстэбиитэлэ Дьокуускайга кэллин, бииргэ туоруорсуохпут, сыллааҕы бүддьүөккэ уларыйыы киирэ илигинэ хамсанан хаалыаҕыҥ.”
Бу кэнниттэн Кыстатыамҥа диэри кыһыҥҥы суол оҥоһуутун кыһалҕата, эдэр табаһыттарга көмө харчы киириитэ, дьиэ тутар матырыйаал сыаната уонна да атын кыһалҕалар таарылыннылар.
«Саха сирэ» хаһыат, edersaas.ru
Хаартыска sakha.gov.ru